Mádenıet mınıstrligi Denıs Ten jaıynda taralymy 2000 dana kitap shyǵarady
«Biz Denıs týraly barlyq maǵlumattardy jınastyryp, atalmysh kitapty bir túnniń ishinde shyǵardyq. Ony syrǵanaýshymen qoshtasý rásimi kezinde Barys-Arenada tarattyq. Sondaı-aq, qosymsha aqparat jınaqtap, 2000 dana taralymmen shyǵarýdy josparlap otyrmyz, - dedi mınıstrliktiń baspasóz hatshysy Aıdar Qyryqbaı.
Onyń aıtýynsha, qaıǵyly jaǵdaıda qaza tapqan qazaqstandyq sportshynyń ómiri jaıynda jazylǵan eńbek ár túrli jerlerde taratylatyn bolady.
«Aýdandyq, aýyldyq, óńirlik, oblystyq deńgeıde taratý oıymyzda bar. Respýblıkalyq mańyzy bar qalalardyń kitaphanalaryna da jetkizemiz. Sondaı-aq, kitaptardy bizdiń mekemege qarasty sport mektepterine taratýdy josparlap otyrmyz», - dedi A. Qyryqbaı.
Baspasóz hatshysy kitaptyń 10 beti Denıs Tenmen qoshtasý kezinde tanymal otandastarymyz aıtqan sózdermen tolyǵatynyn jetkizdi.
«Erteń barlyǵyn daıyndap, sońyna jetkizemiz dep otyrmyz. Árıne, týyndyny kitaphanalardan da alyp oqýǵa bolady. Sondaı-aq, QR Mádenıet jáne sport mınıstrliginiń resmı saıtynan elektrondyq nusqada qarap shyǵýǵa jaǵdaı jasalǵan», - dedi A. Qyryqbaı.
Eske salaıyq, 19 shilde kúni Denıs Ten kólik urylarynyń shabýyly saldarynan kóp qan joǵaltyp, aýrýhanada qaza tapty.
Almaty qalasynyń ІІD Denıs Tenniń ólimine kúdikti eki azamatty ustady.
