ІІM jolda júrý qaǵıdalaryn mektepte pán retinde bekitýdi usyndy
ASTANA. KAZINFORM — QR ishki ister mınıstrligi jolda júrý qaǵıdalaryn mektepte pán retinde oqytýdy usyndy. Bul týraly Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranbaeva aıtty.
— Qoldanysta bar nárseni aıtar bolsaq, Oqý-aǵartý mınıstrligimen birlesken buıryq bar. Oǵan saı, qosymsha sabaq retinde, ıaǵnı tárbıe saǵaty, ashyq sabaq aıasynda jolda júrý qaǵıdalary úıretiledi. Bul óte az, máselen bastaýysh synyptarda 6, orta synyptarda 8, joǵary synyptarda shamamen 10 saǵat. Bizde jol apatyna jaıaý júrginshi retinde 10-14 jas aralyǵyndaǵy balalar jıi ushyraıy. Sol úshin QR ІІM Oqý-aǵartý mınıstrligine jolda júrý qaǵıdalaryn mindetti pán retinde mektep baǵdarlamasyna qosý týraly usynys jasadyq, — dedi ol «Jibek joly» telearnasyndaǵy «Búgin LIVE» baǵdarlamasynda.
Spıkerdiń aıtýynsha, buǵan deıin de mektepterde jolda júrý erejelerin úıretýge, eske salýǵa arnalǵan buryshtar, alańshalar jumys istep kelgen. Sondaı-aq ár mektepke ınspektorlar bekitilip, jol qaýipsizdigin saqtaý negizderin úıretip kelgen.
— Eger ol usynys qabyldansa, ІІM óz tarapynan avtomektepter kómegimen ádistemelik quraldy daıyndap beredi. Qazir ol jumys aıaqtalyp qaldy, tipti daıyn dep te aıtýymyzǵa bolady. Ol sabaqty mektepte kim beredi degen suraq týady. Kez kelgen óńirde avtomektepter bar, ınspektorlar bar. Tıisti sheshim shyqsa, olar baryp, sabaqty ótkizý máselesi sheshimin taýyp otyr, — dedi Aqtoty Boranbaeva.
Aıta keteıik, elimizde balalardyń jol apatyna ushyraý derekteri azaımaı otyr. Máselen bıylǵy 7 aıda kólik apatynan 176 bala qaıtys bolǵan.