ІІM pedofılderdi ómir boıy baqylaýǵa almaqshy

ASTANA. KAZINFORM — Іshki ister mınıstriniń orynbasary pedofılderdi jazasyn ótep shyqqannan keıin baqylaý merzimin «sheksiz kezeńge» deıin uzartpaqshy.

Bul týraly mınıstrdiń orynbasary Igor Lepeha Májiliste ótken otyrystan keıin málim etti. 

Jýrnalısterdiń suraǵyna jaýap bergen Igor Lepeha quqyq buzýdyń aldyn alý úshin buryn isti bolǵandar men áreketi kúmándi azamattardyń syrtynan baqylaý sharasyn kúsheıtý josparlanyp otyrǵanyn aıtty. Ol bul jańashyldyqtyń qalaı iske asýy múmkin ekenin pedofılderdiń mysalymen túsindirdi.

— Qazir pedofıl jazasyn ótep shyqqannan keıin 8 jyl boıy bizdiń baqylaýymyzda bolady. Endi sol merzimdi sheksiz kezeńge deıin uzartý máselesin pysyqtap jatyrmyz, — dedi mınıstrdiń orynbasary.

BAQ ókilderi «sheksiz kezeń» degen uǵym ómir boıyna degendi bildire me dep surady.

— Biz solaı bolsa dep otyrmyz. Ómir boıyna esepte turǵanyn qalaımyz. Ol baqylaýdyń ishine belgili bir shekteýler de kirýi múmkin. Mysaly, oǵan mektepke nemese balabaqsha mańyna jaqyndaýǵa tyıym salýǵa bolady. Ondaı shekteýdi sot belgileıdi. Sot sheshimin buzsa, biz shara qoldanamyz. Qazir mundaı sharalar 8 jyl kóleminde ǵana qoldanylady. Endi sonyń merzimin áldeqaıda uzartqymyz keledi, — dedi ІІM ókili.

Buǵan deıin Almatyda kámeletke tolmaǵan qyzben jynystyq qatynasqa tústi degen kúdikti ustalǵanyn jazǵanbyz.