ІІM elde alkogol satylymyn shekteý bastamasyn tolyq qoldaıdy - Igor Lepeha

ASTANA. KAZINFORM – QR Іshki ister mınıstriniń orynbasary Igor Lepeha eldegi alkogol ónimderi aınalymyna qoıylatyn talaptardy qatańdatý usynysyna qatysty pikir aıtty.

— Іshki ister mınıstrligi bul usynysty tolyq qoldaıdy. Búginde qylmystardyń basym bóligin ishimdikke masaıǵan adamdar jasaıtyny anyq. Turmysta kisi óltirý derekteriniń kóbisi ishimdik saldarynan bolady, - dedi Igor Lepeha Senatta tilshiler suraǵyna jaýap bere otyryp.

Onyń aıtýynsha, Іshki ister mınıstrligi jaýapty vedomstvolarǵa túngi ýaqytta alkogol satýǵa tyıym salý, onyń saýdasyn arnaıy dúkenderge aýystyrý, sondaı-aq kóńil kóterý oryndarynda alkogol satý ýaqytyn shekteý týraly birneshe ret usynys engizgen.

— Ázirge, munyń bári tek bastama kúıinde qalyp otyr. Bul turǵyda kez kelgen usynysty qoldaımyz. Bul normanyń qabyldanýy Parlamenttiń quzyretinde, - dedi mınıstrdiń orynbasary.

Eske salsaq, jaqynda Májilis depýtaty Magerram Magerramov Premer-mınıstr Oljas Bektenovke joldaǵan depýtattyq saýalynda eldegi alkogol ónimderi aınalymyna qoıylatyn talaptardy qatańdatýdy usyndy.