M. Áýezov atyndaǵy joǵary oqý ornyna zertteý ýnıversıteti mártebesi beriledi

ASTANA. QazAqparat – M. Áýezov atyndaǵy Ońtústik Qazaqstan ýnıversıtetine zertteý ýnıversıteti mártebesi berilýi múmkin. «Ashyq» NQA portalynda jarııalanǵan Úkimet qaýlysynda osyndaı usynys jazylǵan, dep habarlaıdy QazAqparat tilshisi.

«M. Áýezov atyndaǵy Ońtústik Qazaqstan ýnıversıteti kommertsııalyq emes aktsıonerlik qoǵamyna zertteý ýnıversıteti mártebesi berilsin.

Oqý ornyn zertteý ýnıversıtetine aınaldyrý jáne JOO-da jańa ınnovatsııalyq zertteý ekojúıesin qurý ǵylymı-zertteý qyzmetin qarqyndatýdy jáne damytýdy, basym damý baǵyttaryn kadrlyq qamtamasyz etýdi jáne ýnıversıtettiń ǵylymı-bilim berý qyzmetin ınfraqurylymdyq qamtamasyz etýdi túbegeıli ózgertýdi qajet etedi.

Osy maqsattarǵa qol jetkizý úshin Qazaqstan Respýblıkasynyń 2025 jylǵa deıingi ulttyq damý josparynyń, Qazaqstan Respýblıkasynyń ındýstrııalyq-ınnovatsııalyq damýynyń 2020-2025 jyldarǵa arnalǵan memlekettik baǵdarlamasynyń, sapaly bilim berý «Bilimdi ult» ulttyq jobasynyń, Qazaqstan Respýblıkasynyń ǵylymyn damytýdyń 2022-2026 jyldarǵa arnalǵan tujyrymdamasynyń, «Tsıfrlandyrý, ǵylym jáne ınnovatsııa esebinen tehnologııalyq serpilis» ulttyq jobasynyń jáne basqa da baǵdarlamalyq qujattardyń basymdyqtaryna sáıkes júzege asyrylatyn bolady», - dep kórsetilgen Ǵylym jáne joǵary bilim mınıstrligi usynǵan jaǵdaıdy taldaý qujatynda.

Málim bolǵandaı, oqý ornyna zertteý mártebisin berý negizinde onda halyqaralyq eńbek naryǵynyń talaptaryna saı keletin qos dıplomdy bilim baǵdarlamasy ázirlenedi.