ІІM: 7 aı ishinde 20 myń esirtki saıty buǵattaldy
ASTANA. KAZINFORM — Іshki ister mınıstrligi «Zań men Tártip» qaǵıdaty boıynsha jumysty jalǵastyryp otyr. Bul týraly Polisia.kz jazdy.
— Bıyl jeti aıda esirtkige qatysty 4655 quqyqbuzýshylyq anyqtaldy, olardyń 2100-i aýyr jáne asa aýyr qylmystar sanatyna jatady. Esirtki jasyrýshylardan bastap esirtki bıznesin uıymdastyrýshylarǵa deıingi qylmystyq shemalar ashyldy. Uıymdasqan qylmystyq toptardy qurý jáne basqarý faktileri boıynsha 24 qylmystyq is qozǵaldy, onyń ishinde úsh transulttyq qylmystyq top joıyldy. 12 basshy men 48 belsendi qatysýshy ustaldy. Halyqaralyq seriktestik aıasynda Reseı Federatsııasymen birlesip, ótken jyldan beri izdeýde júrgen kúdikti ustaldy. Ol el aýmaǵynda sıntetıkalyq esirtki óndirý boıynsha birneshe esirtki zerthanasynyń jumysyn uıymdastyrǵan. Aǵymdaǵy jyly 11 tonnadan astam esirtkiniń aınalymǵa túsýine jol berilmedi. Sonymen birge sıntetıkalyq esirtkiniń tárkilengen kólemi úsh esege artyp, bir tonnadan asty. Esirtki ósirýdiń 322 faktisi jáne 76 kontrabanda deregi anyqtaldy. Jańa tsıfrlyq sheshimderdiń arqasynda jastar arasynda tanymal esirtki saıttarynyń buǵattalýy úsh esege artty. Olardyń sany 20 myń. Shottarynda 2,5 mıllıard teńge jınaqtalǵan kúdikti operatsııalarmen baılanysty 38 myń bank kartasy buǵattaldy. 102 esirtki zerthanasy joıyldy: olardyń 11 sıntetıka óndirý boıynsha, 91 fıtozerthana. Esirtki bıznesine 110 mln AQSh dollary kóleminde shyǵyn keltirildi. Atalǵan baǵytta jumys jalǵasady, — dedi ІІM esirtki qylmysy qarsy is-qımyl komıteti tóraǵasynyń mindetin atqarýshy Danııar Meıirhan.
Buǵan deıin habarlanǵandaı, Bas prokýror Berik Asylov óńirlerde esirtkige qarsy jańa jobalar júzege asyp jatqanyn málim etken edi.