Lývr mýzeıiniń jańa dırektory belgili boldy
ASTANA. KAZINFORM — Álemge áıgili Lývr mýzeıine jańa dırektor taǵaıyndaldy. Bul qyzmetke Krıstof Lerıbo keledi, dep habarlaıdy Kazinform agenttiginiń EO-daǵy menshikti tilshisi.
Ol buǵan deıin atalǵan qyzmetti atqarǵan Lorans de Kardyń (Laurence des Cars) ornyna keledi. Lorans de Kar bul laýazymdaǵy alǵashqy áıel basshy bolǵan edi. Ol túrli oqıǵalardan, sonyń ishinde atyshýly urlyq pen ózge de daýly jaǵdaılardan keıin qyzmetinen ketken bolatyn.
Frantsýz BAQ-tarynyń jazýynsha, Krıstof Lerıbonyń taǵaıyndalýy — onyń kásibı jolynyń zańdy jalǵasy. Ol buǵan deıin Versal saraıy, Orse mýzeıi jáne Ptı-Pale mýzeıinde basshylyq qyzmetter atqarǵan. Lerıbo iri mádenı mekemelerdi tıimdi basqarýymen, restavratsııalyq jobalardy júzege asyrýymen jáne kelýshiler sanyn arttyrýymen tanymal.
Le Figaro basylymy onyń bes jyl ishinde Ptı-Paleden Orse mýzeıine, odan Versalǵa, keıin Lývrǵa deıingi kásibı jolyn «úlgili mansap» dep baǵalady. Sondaı-aq onyń zamanaýı kózqarasy men basqarýshylyq qabiletin Frantsııa prezıdenti Emmanıýel Makron joǵary baǵalaıtyny atap ótilgen.
Aıta keteıik, Lývr (Musée du Louvre) — Parıj qalasynyń ortalyǵynda ornalasqan, Frantsııanyń ulttyq mýzeıi ári burynǵy korol saraıy. Búginde ol álemdegi eń tanymal ári eń kóp týrıst qabyldaıtyn mýzeılerdiń biri sanalady.
Eske salsaq, jaqynda Frantsııa prezıdenti Emmanýel Makron Lývr murajaıynyń dırektory Lorans de Kardyń otstavkasyn qabyldaǵany málim boldy.
Ótken aıda Lývr EO-ǵa kirmeıtin elderden kelgen týrısterge bılet baǵasyn qymbattatqany belgili boldy.
Byltyr 19 qazandaǵy urlyq kúni qaskóıler jebeli kólik arqyly «Apollo» galereıasynyń terezesinen kirip, zergerlik buıymdar men jalpy quny 88 mıllıon eýroǵa baǵalanatyn qazynalardy segiz mınýtqa jetpeıtin ýaqytta urlap ketken.
Bir aptadan keıin birneshe kúdikti ustaldy. Tonaýdan keıin mýzeı zaldarynyń shamamen úshten birinde beınebaqylaý kameralary bolmaǵany, al qoldanystaǵy dabyl júıesiniń iske qosylmaǵany belgili boldy.
Lývrdaǵy urlyqtan keıin qaýipsizdik júıesi kúsheıtiletini aıtyldy.