Lýkashenko Belarýstegi prezıdent saılaýynda daýys berdi

Belarýste prezıdent saılaýy ótip jatyr, dep habarlaıdy QazAqparat BELTA-ǵa silteme jasap.

Jýrnalısterdiń «Kimge daýys berdińiz» degen saýalyn aldyn ala boljaǵan Prezıdent: «Kimge dep suraǵyń kelse, men saǵan shynymdy aıtaıyn – barlyǵyna!», - dep jaýap berdi. 

Aleksandr Lýkashenko daýys berýge kedergi keltirmeý úshin basqa jerde baspasóz ókilderimen egjeı-tegjeıli sóılesetinin aıtty.

Memleket basshysy saılaý ýchaskesinde baıqaýshylarmen qysqasha tildesti. Ol Belarýs eliniń baıqaýshylar úshin, sondaı-aq saılaýdy jarııalaıtyn jýrnalıster úshin ashyqtyǵyn atap ótti. 

— Eshteńege tyıym salýdyń qajeti joq. Birinshiden, bul bizge qajet emes. Ekinshiden, bizdiń ashyqtyǵymyzdy kórsin, - dedi Aleksandr Lýkashenko. 

Buǵan deıin áleýmettik zertteýde Belarýs halqynyń 85,5 paıyzy prezıdent saılaýyna qatysatyny aıtylǵan bolatyn. Sondaı-aq Belarýste prezıdent saılaýy ótip jatqanyn habarlaǵan edik.