Lýdomanııa belgileri alkogolızm men nashaqorlyqqa uqsas – psıhıatr

Lýdomanııa – adam ómirin buzatyn aýyr psıhıkalyq dert. Bul týraly óńirlik kommýnıkatsııalar qyzmetinde Almaty psıhıkalyq densaýlyq ortalyǵynyń dırektory Sapar Rahmensheev aıtty, dep habarlaıdy Kazinform.

Spıkerdiń sózinshe, lýdomandardyń sany kún sanap artyp keledi.

Buǵan patsıentterdiń ózinen jáne táýeldi adamdardyń jaqyndarynan túsken ótinishter dálel bola alady.

«Bizdiń ortalyqta táýlik boıy jumys isteıtin 376 56 60 senim telefony bar. Bizde ótken jylmen salystyrǵanda qońyraýlar sany 600-ge ósti. Olardyń kóbi lýdomanııaǵa qatysty. Adamdar osy táýeldilikten qalaı emdelýge bolatynyn suraıdy», - deıdi Sapar Rahmensheev.

Almatynyń bas psıhıatry lýdomanııa ár adamda ártúrli bolýy múmkin ekenin atap ótti.

«Eger adamdar buryn kazınoǵa baryp, bás tigetin bolsa, qazir áleýmettik jelilerdi damytýdyń arqasynda adam úıden nemese keńseden shyqpaı oınaı alady. Taǵy bir sebep – «ońaı aqsha» dep atalatyn aqsha tabý joly. Adam oınaý arqyly ońaı aqsha izdeı bastaıdy. Sondaı-aq, depressııaǵa ushyraǵan kezde, táýeldi adam qoǵammen baılanysyn joǵaltady, tuıyqtala bastaıdy jáne tek oıynmen aldanady. Taǵy bir sebep – eresekter balalar sııaqty áreket etip, jaýapkershilikti alǵysy kelmeı, janjaldan qashýy»,-dedi ol.

Aıtýynsha, lýdomanııa belgileri alkogolızm men nashaqorlyqqa uqsas.

«Mysaly, lýdoman oınaı bastaǵanda denede adrenalın men dofamın bólinedi, bul eıforııalyq kúıge ákeledi. Ol únemi osy kúıde bolǵysy keledi jáne táýeldilikke ketedi. Lýdomanııa - bul adamnyń ómirin buzatyn aýyr, psıhıkalyq aýrý. Adamdar kóp nárseni, jumysty, otbasyndaǵy, qoǵamdaǵy ornyn joǵalta bastaıdy», - dep tolyqtyrdy sarapshy.

Sonymen qatar, ol lýdomandy qalaı anyqtaýǵa bolatynyn tilge tıek etti.

«Lýdomandy anyqtaý ońaı. Adam ózgere bastaıdy, ashýlanshaq bolady. Qumar oıynǵa táýeldi adam jıi ótirik aıtady, úıge aqsha ákelýdi toqtatady. Eger atalǵan «belgiler» baıqalsa, sarapshy mamandardyń kómegine júginý kerek. Bul psıhologtar nemese psıhoterapevtter bolýy múmkin. Bizdiń ortalyqta statsıonarlyq em kórsetilgen bólim bar. Onda depressııaǵa ushyraǵan, uıqysy buzylǵan naýqastar jatady. Olardy emdeýde uıqyny jaqsartatyn, depressııany jeńildetetin dári-dármek qoldanylady, bizdiń psıhoterapevtter olarmen qatar jumys isteıdi. Bizdiń tájirıbemizde týystary olardy jarnamaǵa senip, halyq emshilerine aparǵan naýqastar kezdesti. Nátıjesinde olar emdelmeıdi, biraq bizge kúrdeli túrde keledi. Sondyqtan men mamandarǵa júginýdi usynamyn», - dep atap ótti S. Rahmensheev.