LRT isi: Interpol Talǵat Ardannyń qaıda ekenin anyqtamady
ASTANA. KAZINFORM — QR Bas prokýrorynyń orynbasary Áset Shyndalıev Interpol «Astana LRT-nyń» burynǵy basshysy Talǵat Ardannyń naqty qaıda júrgeni týraly málimet bermegenin aıtty.
— Іzdeýdiń birneshe túri bar. Bizdegi quqyq qorǵaý organdary negizinen el ishindegi izdeýmen aınalysady. Halyqaralyq izdeý quzyreti Interpolǵa tıesili. Biz Interpolǵa tıisti nusqaý beremiz, olar osymen aınalysyp jatyr, — dedi Áset Shyndalıev Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, ekstradıtsııalaý úshin Interpol izdeýde júrgen adamnyń ornalasqan jerin naqty anyqtap, sheteldiń quzyrly organdarymen birge ustaý sharalaryn uıymdastyrýy kerek. Osydan keıin ekstradıtsııalaýǵa suraý jiberiledi.
— Ázirge, Interpol bul adamnyń qaıda ekenin nemese qamaýǵa alý sharalarynyń oryndalý barysy týraly naqty málimet bergen joq, — dedi Bas prokýrordyń orynbasary.
Budan buryn habarlanǵandaı, 2023 jyly mamyrda elordada salynbaı qalǵan Astana LRT qurylysyna qatysty qylmystyq is boıynsha sot úkimi shyqty. Sot úkimimen Talǵat Ardan men Qanat Sultanbekov 7 jylǵa sottaldy.
Bas prokýratýra Talǵat Ardan men Qanat Sultanbekovti izdeý jumysynyń toqtamaıtynyn aıtty.
Eske salsaq, Astana qalalyq sotynyń qylmystyq ister jónindegi sot alqasynyń 2024 jylǵy 25 jeltoqsandaǵy qaýlysymen sot úkimi ózgerissiz, Talǵat Ardannyń qorǵaýshysynyń apellıatsııalyq shaǵymy qanaǵattandyrýsyz qaldyryldy.