LRT qurylysyna zeınetaqy qorynan qarjy alynbaıdy – Altaı Kólginov
«LRT boıynsha kóptegen máseleler bar. Munyń óte kúrdeli joba ekenin bilesizder. Joba birneshe jyl buryn bastaldy, kóptegen ınjenerlik jeliler tartyldy, qyrýar qarajat jumsalǵany túsinikti. Qıyndyqtar «Astana banki» lıtsenzııasynan aıyrylǵan kezde týyndady. Endi bul qomaqty kapıtaldy qajet etetin joba. Sondyqtan qazir pandemııa kezinde banktermen jumys ýaqytsha toqtatyldy, biraq bastapqy ıdeıa – qala ósip, jolaýshylar kóliginiń qosymsha túrlerin engizý qajettigi edi. Iá, shynymen de keıbir problemalar boldy. Qazir quqyq qorǵaý organdary tarapynan da sot tergeý jumystary júrip jatyr. Sondyqtan LRT – ońaı sharýa emes», - dep jaýap berdi ákim Ortalyq kommýnıkatsııalar qyzmetinde tilshi suraǵyna.
A. Kólginov BJZQ men Ulttyq qordyń qarajatyn jobaǵa tartý máselesi qaralmaıtynyn aıtty.
«Zeınetaqy qorynan da, Ulttyq qordan da qarajat tartý máselesi qaralmaǵan jáne qaralmaıdy. Bastapqyda alǵashqy ınvestıtsııalyq qarajat Qytaı damý bankinen alyndy. Bul – syrttan tartylǵan qarajat. Sondyqtan olar valıýtada qarastyrylǵan», - dep túsindirdi ákim.
Sonymen birge, Altaı Kólginov LRT qurylys kezeńderi týraly aıtyp berdi.
«Men jobanyń tarıhymen tanystym – bul birinshi kezeń. Sodan keıin ekinshi kezeń – eski vokzalmen jalǵaý bolatyn. Osyndaı úlken josparlar boldy, biraq ekonomıkalyq jaǵdaıdy eskere otyryp, ekinshi kezeń taqyrybyn áli kótermedik. Biraq birinshi kezeń bastaldy, oǵan qansha ınfraqurylym salynǵanyn kórip otyrsyzdar. Sodan keıin bul áýejaı jolaýshylary úshin ǵana josparlanbaǵanyn túsiný kerek. Qalamyz ulǵaıyp keledi, bes jyl buryn Qabanbaı batyr boıynda turǵyn úıler bolmaǵan edi, al qazir qanshama shaǵynaýdan paıda boldy», - dep atap ótti ákim.
Eske sala keteıik, buǵan deıin QR Sybaılas jemqorlyqqa qarsy is-qımyl agenttigi jeńil relsti kólik jobasyn iske asyrý kezinde 5,8 mlrd teńge urlaý faktisi boıynsha istiń sotqa berilgenin habarlaǵan bolatyn.