«Lotereıa oıyny retteletin boldy» - baspasózge sholý
***
«Egemen Qazaqstan» gazetinde «Almatyǵa «súıeksiz» adam keledi» atty materıal jaryq kórdi. Gınnestiń rekordtar kitabyna engen daǵystandyq «býynsyz» adam Mýhtar Gýsengadjıev 21-22 aqpanda Almatyǵa kelip, semınar-trenıng ótkizedi. Qazirgi tańda atalmysh sharany uıymdastyrýshylar tanymal azamattyń saparyna oraı daıyndyq jumystaryn júrgizýde. Aıta keteıik, M.Gýsengadjıev jahandaǵy eń ıilgish adam ǵana emes, sonymen birge, estradalyq, tsırktik, sporttyq festıvalderdiń jeńimpazy jáne kóptegen ataqtardyń ıesi. Onyń, ásirese, plastıka boıynsha jattyqtyrýshy retinde dańqy ǵalamǵa jaıylǵan. Ol Madonna, Pamela Anderson, Demı Mýr syndy belgili adamdarǵa jeke sabaq bergen. Sondaı-aq, Mýhtar «Tsırk dıý Soleıdiń» ataqty ártisi retinde de tanymal.
***
«Aıqyn» gazetinde «Lotoreıa oıyny retteletin boldy» degen maqala kópshilik nazaryna usynylyp otyr. Memleket Qazaqstandaǵy tabysy mol salalardyń qatarynda sanalatyn lotereıa sektorynyń tizginin myqtap óz qolyna aldy. Osyǵan oraı el Parlamentine jaqynda «Lotereıalar jáne lotereıa qyzmeti týraly» jańa zańnyń jobasy engizilgen bolatyn. Májiliste qurylǵan arnaıy top osy qujat boıynsha jumysqa kirisip ketti. Zań jobasyn qalaýlylar aldynda qorǵaǵan Mádenıet jáne sport mınıstri Arystanbek Muhamedıulynyń aıtýynsha, búgingi tańda elimizde lotereıa qyzmetin memlekettik retteý nebári «lıtsenzııa berýmen» ǵana shekteledi. Alaıda mundaı retteý kútiletin nátıje ákelmepti. Óıtkeni sala damyp jatqan joq, qaıta barǵan saıyn, bul qyzmetke shekteýli toptyń qolynda shoǵyrlaný qaýpi tóne bastaǵanǵa uqsaıdy. «Atap aıtqanda, qazirgi ýaqytta jekemenshik sektordaǵy 70-ten astam sharýashylyq júrgizýshi sýbekti osyndaı lıtsenzııaǵa qol jetkizgen eken. Bir qaraǵanda, endi olar arasynda qatań básekelestik qyzýǵa tıisteı. Alaıda tek sonyń ony ǵana lotereıa uıymdastyrýmen aınalysady. Onyń ústine kirisi shash etekten keletin bul saladan el qazynasyna túsip otyrǵan túsim de shamaly»,-dep jazady basylym. Úkimettiń habarlaýynsha, lotereıalar ótkizýden memlekettik bıýdjetke tólengen salyqtardyń jáne basqa da mindetti tólemderdiń jalpy kólemi 2009 jyly 48 mıllıon teńgege jýyq, 2010 jyly - 153 mıllıon teńgedeı, 2011 jyly 219 mıllıon teńgege jýyq bolǵan. Ras, 2012 jyly kúrt ósip, eki eselenip, 433 mıllıonǵa jetti. Biraq túsimniń ósý qarqyny tez baıaýlap, 2013 jyly 533 mıllıon teńgeni qurady. Byltyrǵy túsim de sol mańaıda.
***
«Ana tili» gazetiniń sońǵy sanynda «Kitaphanalarda qandaı kitap kóp oqylady?» degen maqala jarııalandy. «Qazirgi kezde osyndaı saýalnama jıi uıymdastyrylyp júr. «El ne oqıdy?» degen suraqqa budan artyq ádil tóreshi bola almaısyz. Qansha namysqa salǵanymyzben, álemdik deńgeıde nasıhaty qatty júrip jatqan shetel jazýshylarynyń kitaptary alǵa shyǵyp turǵany da talassyz. Endeshe, bizdiń jazýshylarymyz da básekege qabiletti bolýy kerek. Osy turǵyda qazaq tilinde oqylymdy kitap kóbeısin degimiz keledi»,-dep jazady maqala avtory.
***
«Ekspress-K» gazetinde «Bakı pod zavıazký» atty maqala berilgen. «QazMunaıGaz» ulttyq kompanııasynyń basshysy Saýat Myńbaev Qazaqstandaǵy janar-jaǵarmaı quıý stansalarynda benzın baǵasynyń arzandaýy múmkin ekenin aıtty. Onyń sózine qaraǵanda, bul ishki naryqqa reseılik arzan otynnyń kóptep jetkizilýine baılanysty. Atap aıtqanda, benzın saqtaıtyn qoımalar elimizdiń barlyq aımaqtarynda toltyrylǵan kórinedi.
