Londondaǵy qazaqstandyqtar tańǵy ýaqyttan beri referendýmda daýys berip jatyr
ASTANA. KAZINFORM – Qazaqstan azamattary tańǵy ýaqyt pen qashyqtyqqa qaramastan Londondaǵy elshilikke daýys berýge kelip jatyr, dep habarlaıdy Kazinform agenttiginiń menshikti tilshisi oqıǵa ornynan.
Búgin, London ýaqytymen tańǵy saǵat 7:00-de (Astana ýaqytymen 12:00) Qazaqstannyń Ulybrıtanııa men Soltústik Irlandııanyń Birikken Koroldigindegi elshiliginde referendýmnyń № 408 saılaý ýchaskesi ashyldy.
Munda Ulybrıtanııa, Soltústik Irlandııa, Irlandııa Respýblıkasy jáne Islandııada turatyn nemese ýaqytsha júrgen daýys berýge quqyǵy bar Qazaqstannyń eresek azamattary daýys bere alady.
Daýys berýshiler ártúrli sanda kelip júr: keıbireýleri daýys berýge jalǵyz kelse, basqalary otbasy múshelerimen birge qatysyp otyr. Kelgenderdiń arasynda brıtandyq ýnıversıtetterde bilim alyp júrgen kóptegen jastar bar. Sondaı-aq daýys berýge qatysý úshin basqa qalalardan arnaıy kelgender de bar.
Daýys berýge birinshi bolyp London ýnıversıteti kolledjiniń hımııalyq ınjenerııa fakýltetiniń doktoranty Rýslan Shaıahynuly keldi.
- Bul bizdiń elimiz úshin onyń bolashaq damý baǵytyn anyqtaıtyn jaýapty qadam. Meniń oıymsha, respýblıkanyń árbir azamaty daýys berip, sol arqyly el taǵdyryna atsalysý kerek, - dedi ol.
Rýslan Shaıahynuly Londonda tórt jyl boıy oqyp júr jáne saılaýǵa únemi qatysyp keledi. Ol úshin bul tek azamattyq ustanymyn bildirý múmkindigi ǵana emes, sonymen qatar otandastarymen kezdesý, aralasý jáne jańalyqtar almasý múmkindigi.
Elshilikte qonaqtar úshin ulttyq taǵamdar qoıylǵan shaǵyn ústel jaıyldy. Qonaqtardy dástúrli toqashtar men táttiler, sondaı-aq ystyq shaımen qarsy alyp jatyr.
- Men úshin daýys berýge jeke qatysý mańyzdy boldy. Men elde bolyp jatqan ózgeristerge qyzyǵýshylyq tanytamyn jáne ózimniń azamattyq ustanymymdy bildirgim keldi, - dep atap ótti Kazinform agenttigine Brýnel ýnıversıtetiniń magıstranty jáne London Kazakh Centre dırektory Qýat Serikov.
Onyń aıtýynsha, saılaýda daýys berý – árbir azamat úshin eldiń damýyna úles qosý múmkindigi. Sondaı-aq ol jastardyń mańyzdy rólin atap ótip, bolashaq kóbinese olardyń belsendiligi men jaýapkershiligine baılanysty ekenin atap ótti.
Referendýmnyń saılaý ýchaskesi London ortalyǵyndaǵy Pell-Mell, 125 mekenjaıynda ornalasqan. Daýys berýshiler bıýlleten alý úshin Qazaqstan azamatynyń jeke basyn kýálandyratyn qujatyn kórsetýi kerek.
Daýys berý jergilikti ýaqyt boıynsha keshki saǵat 20:00-ge deıin jalǵasady, bul Astana ýaqyty boıynsha saǵat 1:00-ge sáıkes keledi. Daýys berý aıaqtalyp, bıýlletender sanalǵannan keıin qorytyndy referendýmnyń Ortalyq komıssııasyna áýe poshtasymen jiberiledi.
Eske sala ketsek, Qazaqstandaǵy referendýmnyń barlyq saılaý ýchaskesi Astana ýaqyty boıynsha tańǵy saǵat 7:00-de ashyldy.