Londonda Ulybrıtanııa men Ýkraına arasyndaǵy kelissózder qalaı ótti

ASTANA. KAZINFORM —  Sársenbide Londonda Ýkraına, AQSh jáne Eýropa delegatsııalarynyń qatysýymen kelissózder ótti, onda AQSh-tyń beıbit retteý jónindegi usynystary talqylandy. Bul týraly BBC habarlady.

Londondaǵy kezdesýdiń mártebesi aıtarlyqtaı tómendedi, sebebi oǵan AQSh Memlekettik departamentiniń basshysy Marko Rýbıo kelmedi.

Ýkraına prezıdenti Zelenskııdiń keńsesiniń basshysy Andreı Ermaktyń aıtýynsha, Ulybrıtanııanyń, Frantsııanyń jáne Germanııanyń ulttyq qaýipsizdik jáne syrtqy saıasat boıynsha keńesshilerimen Londondaǵy kezdesýde Ýkraınadan onyń ózi, syrtqy ister mınıstri Andreı Sıbıga jáne qorǵanys mınıstri Rýstem Ýmerov qatysty.

Ulybrıtanııadan premer-mınıstrdiń ulttyq qaýipsizdik boıynsha keńesshisi Djonatan Paýell, Frantsııadan prezıdenttiń dıplomatııalyq keńesshisi Emmanýel Bonn, Germanııadan kantslerdiń syrtqy saıasat jáne qaýipsizdik boıynsha keńesshisi Iens Pletner qatysty.

Kezdesý Ulybrıtanııa syrtqy ister mınıstri Devıd Lemmıdiń shaqyrýymen Ulybrıtanııanyń syrtqy ister mınıstrliginiń resmı rezıdentsııasynda ótti.

— Bul ekinshi kezdesý boldy,  aldyńǵysy Parıjde ótti. Búgin biz Ýkraınada ádil jáne turaqty beıbitshilikke qol jetkizý úshin tereń dıalogty jalǵastyrdyq. Biz AQSh prezıdenti Donald Tramptyń beıbitshilikke degen kúsh-jigerin qoldaıtynymyzdy atap óttik. Biz seriktesterge turaqty qoldaýy úshin jáne soǵysty tezirek toqtatý úshin birlesken umtylystary úshin alǵysymyzdy bildiremiz… Aldaǵy ýaqytta turaqty konsýltatsııalar ótkizý týraly kelistik — basty maqsatqa jetý úshin: Ýkraına úshin ádil beıbitshilik, — dep jazdy Ermak Telegram arnasynda.

Buryn AQSh prezıdenti Donald Tramp jeksenbide Reseı men Ýkraına osy aptada «beıbit kelisimge qol jetkizýi múmkin» dep málimdegen bolatyn.