Londonda qazaq kınosynyń onlaın aptalyǵy bastaldy
Sharany Qazaqstan Táýelsizdiginiń 30 jyldyǵyna oraı QR Ulybrıtanııadaǵy Elshiligi jáne «Sháken Aımanov atyndaǵy «Qazaqfılm» AQ birlesip uıymdastyrdy.
Dóńgelek ústelge QR Ulybrıtanııadaǵy Elshisi Erlan Ydyrysov, Djordj Vashıngton ýnıversıtetiniń fakýltet isteri jáne zertteý bastamalary jónindegi dekannyń orynbasary professor Pıter Rollberg, sondaı-aq Aberıstýıt ýnıversıteti kınotaný ǵylymynyń Qurmetti professory Bırgıt Boımers qatysty.
Moderator londondyq Marııa patshaıym ýnıversıtetiniń Vızýaldy mádenıetter kafedrasynyń doktoranty Ásııa Isemberdıeva boldy.
Elshi E.Ydyrysov alǵy sózinde qazaq ómiriniń barlyq salasyn qamtıtyn baı aýyzsha shyǵarmashylyq jáne tabıǵatpen birlik dástúri qazaq mádenıetiniń ajyramas bóligi ekendigin atap ótti.
E.Ydyrysovtyń aıtýynsha, búginde bul dástúr kınoǵa jıi júginedi, al qazaqstandyq kınematograf ondaǵan jyldar boıy sapaly týyndylarymen tanymal bolyp, keńestik kınomasterlik mektebiniń úzdik qasıetterin dala dúnıetanymymen ushtastyra bildi.
Professor P.Rollberg aýyzsha shyǵarmashylyq jáne onymen baılanysty akterlik sheberlik pen ımprovızatsııa óneri qazaq mádenıetinde erekshe damyǵandyǵymen kelisti.
Ol qazaqstandyq kınematograftyń damý kezeńderine jan-jaqty toqtap, atap aıtqanda, «Amangeldi», «Bizdiń súıikti dáriger», «Atameken», «Sultan Beıbarys» fılmderi jaıly, sondaı-aq qazaqstandyq rejısser jáne kınoakter, ańyz adam Sháken Aımanov týraly áńgimelep berdi.
Professor B.Boımerstiń baıandamasy keıingi kezeńge – «jańa tolqyn» jáne táýelsiz «partızan kınosynyń» gúldenýine arnaldy.
Onyń aıtýynsha, qazaqstandyq kınematograftyń zamanaýı trendteri Qazaqstanǵa iri halyqaralyq kınofestıvalderde jıi atyn shyǵaratyn múmkindikter beredi.
Ol sondaı-aq qazaqstandyq kınematografty damytý, táýelsiz kınony qoldaý jáne halyqaralyq kınoprodıýserlermen baılanys ornatý úshin jaǵdaı jasaýdyń mańyzdylyǵyn atap ótti.
«Bul Qazaqstanǵa áli de óziniń tili bolyp tabylatyn, biraq sonymen birge halyqaralyq rezonans pen ámbebap kontekstke ıe tilde sóıleı bastaýǵa naqty serpin beredi. Mundaı yntymaqtastyq qazaqstandyq fılmderdiń halyqaralyq kórermenge jol tabýy úshin óte mańyzdy», – dedi professor.
Ulybrıtanııadaǵy qazaqstandyq kınonyń onlaın-aptalyǵynda otandyq kınematograf klassıkasynyń jaýharlary, sondaı-aq qazaqstandyq kınematografısterdiń halyqaralyq deńgeıde tanylǵan jumystary usynylǵan.
Birinshi kúni kórermenderge rejısser Bolat Mansurovtyń «Sultan Beıbarys» fılmi kórsetildi.
Týyndyda bir kezderi quldyqqa alynyp, Mysyrdyń bıleýshisi bolǵan qypshaq balasynyń oqıǵasy baıandalady.
Kartınanyń basty keıipkeri óziniń uzaq jáne dramalyq ómiriniń sońyna qaraı bılikti, mahabbatty, renishti jáne Otanyna degen jan kúızelisin bastan keshirip, ata-babasy turǵan jerge – týǵan qazaq dalasyna oralady.
Onlaın-kórsetilimderge brıtanııalyq kınosynshylardyń qatysýymen uıymdastyrylǵan akter jáne rejısserlermen eksklıýzıvti suhbattar ótkizildi.
Suhbatqa qatysýshylar:
- «Qyz jylaǵan» fılminde ekinshi plandaǵy róldi somdaǵan belgili qazaqstandyq akter Dýlyǵa Aqmolda. Fılm ıadrolyq qarýdy synaýdyń epıtsentrinde ornalasqan Semeı oblysyndaǵy qazaq aýylynyń ómiri týraly baıandaıdy. Fılmniń rejısseri Satybaldy Narymbetov 2021 jyly mezgilsiz qaıtys boldy;
- Narıman Tórebaev, Fedor Dostoevskııdiń «Belye nochı» povesiniń jelisimen túsirilgen «Shytyrman» fılmin túsirgen tanymal qazaqstandyq kınorejısser;
- akter jáne rejısser Sanjar Mádı. Ol eýropalyq jurtshylyqqa qazaqtyń vokaldyq-oryndaýshylyq óneri men ulttyq aspaby – dombyrany birinshi bolyp álemge tanytqan Ámire Qashaýbaev týraly syr shertetin «Ámire» fılminiń basty keıipkeri;
- kınorejısser Ádilhan Erjanov. Onyń «Sary mysyq» fılmi 2022 jylǵy «Oskar» syılyǵyna «Shet tilindegi úzdik fılm» nomınatsııasyna Qazaqstannan usynyldy.
Barlyq fılmder men suhbattar 2021 jyldyń 15 jeltoqsanyna deıin myna silteme boıynsha qol jetimdi.
