Londonda Dúnıejúzilik ıadrolyq sımpozıýmda atomdyq energetıkanyń artyqshylyqtary talqylandy
LONDON. KAZINFORM — Londonda atom ónerkásibiniń kóshbasshylary jınalyp, baǵa jetpes ıdeıalarymen bólisti. 700-ge jýyq sala mamany 3 kún boıy taza ári turaqty qýat kóziniń búgini men bolashaǵyn talqylap, tájirıbe almasty, dep habarlaıdy Kazinform tilshisi.
Kóptegen memleket arzan ári úzdiksiz energııaǵa qol jetkizýdi maqsat etedi. Óıtkeni ol ǵalamshardy lastanýdan saqtap, gúldendenýine septigin tıgizedi. Birikken Ulttar Uıymynyń 2024 jylǵy Klımattyń ózgerýi jónindegi konferentsııasynda aıtylǵandaı, atom energııasyn paıdalanatyn elder parnıktik gaz shyǵaryndylaryn tez jáne turaqty túrde azaıtyp otyra alady.
«Álemniń 199 eli klımattyq ózgeristerdiń aldyn alý úshin atom elektr stantsııalarynyń kerektigin moıyndady. Qorshaǵan ortany lastaıtyn parnıktik gazdardan qutylýdyń ekonomıkalyq turǵyda tıimdi joly sol stantsııalardy salý. Dúnıe júzi boıynsha ıadrolyq energııaǵa degen suranystyń artqanyn biz baıqap otyrmyz», — dedi Dúnıejúzilik ıadrolyq qaýymdastyqtyń bas dırektory Sama Bılbao-ı-Leon.
ıAdrolyq energııanyń taza aýadan da basqa bereri kóp. Damyǵan memleketterde ol ekonomıkalyq turǵyda tıimdiligin kórsetýde. Máselen, Rýmynııada 2 ıadrolyq reaktor bar. Olar eldegi elektr energııasynyń shamamen 20 paıyzyn óndirip otyr.
«Aldaǵy 10 jyl ishinde Rýmynııa óz ekonomıkasyn dekorbanızatsııalaý maqsatynda bul kórsetkishti eki esege deıin ulǵaıtpaq. Jobalarymyzdy sátti júzege asyryp, tájirıbe jınaqtaýdyń arqasynda atom stantsııasynyń qýattylyǵy jáne qaýipsizdigi jaǵynan biz jetekshi elderdiń birine aınaldyq. Qajet bolǵan jaǵdaıda bilimimizben bólisýge daıynbyz», — dedi Nuclearelectrica kompanııasynyń bas atqarýshy dırektory Kosmın Gıta.
ıAdrolyq elektr stantsııalary burynnan bar nemese olardyń qurylysymen endi aınalysyp jatqan memleketter atom energetıkasynyń mańyzdylyǵyn tolyq moıyndaıdy. Indýstrııa da óziniń damý josparyn ilgeriletip keledi. Sharaǵa qatysýshylardyń arasynda qazaqstandyq ókilder de bar.
«Azamattarymyzdy atomdyq energetıkadan qoryqpaýǵa shaqyrǵym keledi. Óıtkeni ol bolashaqtyń kilti, qorshaǵan ortany lastamaıtyn taza qýat kózi. Búgingi sımpozıýmǵa qatysqan memleketterdiń barlyǵynda atom elektr stantsııalary bar. Olardyń halqy arzan jáne turaqty energetıkanyń rahatyn kórip jatyr», — dedi «Tór Altaı NuclearConsulting» JShS bas seriktesi Amanjol Elemesov.
Atom salasyndaǵy eń iri sımpozıým jyl saıyn uıymdastarylady. Bıyl ol 44 elden kelgen 700-ge jýyq Dúnıejúzilik ıadrolyq qaýymdastyq múshesiniń basyn qosty. Atap aıtqanda ýrandy óndirý, konversııalaý, baıytý boıynsha sala mamandary, ıadrolyq ınjınırıng jáne reaktor tasymaldaý kompanııalarynyń ókilderi, ǵalymdar jáne úkimet músheleri qatysty.
