Logıstıka men dári berý tártibi qaıta qaralyp jatyr

Densaýlyq saqtaý mınıstriniń tapsyrmasyna sáıkes Aqmola oblysyna jumys sapary aıasynda patsıentterdi dári-dármekpen qamtamasyz etýdegi problemalardy sheshý boıynsha jedel ári júıeli sharalar qabyldandy.

«SQ-Farmatsııa» JShS Basqarma tóraǵasy Nurlybek Asylbekov 2025 jylǵy 12 shildede Kókshetaý qalasyna sapary barysynda medıtsınalyq uıym men jalpy oblystaǵy dári-dármekpen qamtamasyz etý júıesiniń naqty jaǵdaıymen tanysý úshin monıtorıng júrgizdi. Negizgi maqsat — patsıentterdiń únin estip, áreket etý jáne naqty ahýaldy baǵalaý.

Sapar «Viamedis» medıtsınalyq uıymynan bastaldy. Biryńǵaı dıstrıbıýtordyń basshysy munda dárilik zattardy saqtaý, taratý sharttarymen, logıstıkamen jáne patsıenttermen ózara áreket etý tártibimen tanysty. Buǵan deıin bul mekeme boıynsha halyq tarapynan kezekter men shamadan tys júktemege baılanysty shaǵymdar túsken bolatyn.

Іs-sharaǵa oblystyq Densaýlyq saqtaý basqarmasynyń, Medıtsınalyq jáne farmatsevtıkalyq baqylaý komıtetiniń, Salıdat Qaıyrbekova atyndaǵy Ulttyq densaýlyq saqtaýdy damytý ǵylymı ortalyǵynyń jáne «STOFARM» JShS ókilderi qatysty.

Aıta ketý kerek, 2025 jylǵa «Viamedis» uıymy 1,7 mlrd teńgege 270 ataýly dári-dármekke tapsyrys berip, qosymsha qajettilik retinde taǵy 262,2 mln teńgeniń ótinimin joldaǵan. 12 shildedegi jaǵdaı boıynsha jyldyq kólemniń 80%-y jetkizilgen, al medıtsınalyq uıymnan jetkizilim boıynsha shaǵymdar bolmaǵan.

Medıtsınalyq uıymdy aralaý kezinde patsıentterdiń negizgi narazylyqtarynyń biri — dári-dármektiń ár úsh aıda bir ret berilýi ekeni anyqtaldy. Osyǵan baılanysty, «SQ-Farmatsııa» bastamasymen jáne Densaýlyq saqtaý basqarmasynyń qoldaýymen 2025 jylǵy 1 tamyzdan bastap dáriler aı saıyn beriletin bolady. Bul sheshim patsıentter aǵynyn durys bólýge jáne kezekterdi azaıtýǵa múmkindik beredi.

Óz kezeginde, «Viamedis» ókili jetkizilimderdiń birkelki emestigin aıtty: dáriler belgilengen keste boıynsha jiberilse de, keıbir pozıtsııalar birneshe bólikpen, kóbine toqsan sońyna qaraı ǵana jetkiziledi. Bul qyzmetkerlerge qosymsha júkteme týdyryp, dárilerdiń ýaqytsha jetispeýshiligine alyp keledi. Osy máselege baılanysty Nurlybek Asylbekov «SQ-Farmatsııanyń» logıstıka basqarmasyna barlyq jetkizýshilermen kelisip, dárilerdi ár aıdyń alǵashqy onkúndiginde, ıaǵnı 15-ine deıin tolyq kólemde jiberý úshin kesteni qaıta kelisýdi tapsyrdy. Fors-major jaǵdaıynda merzimdi 20-na deıin shegerý ruqsat etiledi.

Sonymen qatar, dári-dármekti berý bir ǵana tereze arqyly júrgizilip otyrǵany anyqtaldy, bul óz kezeginde patsıentter úshin qolaısyzdyq týǵyzýda. Biryńǵaı dıstrıbıýtor basshysy dárihana pýnktinde keminde eki tereze ashýdy jáne kelýshiler kúnin teńdeı bólý úshin túsindirý jumystaryn júrgizýdi usyndy. Bul usynysty Densaýlyq saqtaý basqarmasy men medıtsınalyq uıym da qoldady. Qabyldanǵan sheshimderdiń oryndalýyn oblystyq Densaýlyq saqtaý basqarmasy baqylaıtyn bolady.

Oblystaǵy ózekti máseleler talqylaýy Aqmola oblystyq Densaýlyq saqtaý basqarmasynda jalǵasty. Onda naqty problemalar kóterilip, júıeli sheshý joldary usynyldy. Ásirese, logıstıkalyq ınfraqurylym máseleleri qozǵaldy. «SQ-Farmatsııa» basshysy keıbir óńirlerde qoıma alańdarynyń jetispeýshiligi dári-dármekterdi turaqty ári ýaqytyly jetkizýge keri áser etetinin atap ótti.

«STOFARM» ókili de shuǵyl jaǵdaıdaǵy naýqastar úshin medıtsınalyq uıymdardan kútpegen, jospardan tys tapsyrystardyń túsýi josparly jetkizilimderdiń boljamdylyǵyn tómendetip, táýekel týdyratynyn jetkizdi.

Sondaı-aq, birqatar dári-dármekter boıynsha tapshylyq máselesi kóterildi. Óńirde 8 dári-dármek pozıtsııasy boıynsha defıtsıt anyqtaldy. Olar tutyný kóleminiń azdyǵy jáne tómen baǵa usynylýy sebebinen jetkizýshiler úshin qyzyqsyz bolǵandyqtan satyp alynbaǵan.

— Búginde oblysta operatsııalyq qoıma bolmaýy Astana qalasyndaǵy habqa úlken salmaq túsirýde. Qazirgi tańda bul hab birden tórt operatsııalyq qoımany qamtamasyz etýde, bul dári-dármekpen ýaqytyly qamtýdy qıyndatady. Qoıma máselesin sheshý úshin qyzmetterdi satyp alý boıynsha jumystar júrgizilýde, olar shamamen tamyz aıyna qaraı aıaqtalady dep kútilýde. Nátıjesinde tıisti sharalar qabyldanatyn bolady.

Sonymen birge, ótinimderdiń sapasyna da erekshe kóńil bólý kerek. Durys josparlanbaǵan qajettilik bıýdjet qarjysynyń tıimsiz jumsalýyna ákeledi. Eger dárilerden bas tartý jaǵdaılary kóp bolsa, bul óńirlik ókilderdiń medıtsınalyq uıymdarmen tıimdi jumys júrgizbegeniniń belgisi.

Osyǵan baılanysty, oblystaǵy dári-dármekpen qamtamasyz etý máselelerin óńirlik ókildik, dári-dármekpen qamtamasyz etý jáne logıstıka basqarmalary baqylaýǵa alyp, aptalyqnegizde esep berip otyrýy tıis, — dedi Nurlybek Asylbekov.

Nátıjesinde kelesi júıeli sheshimder qabyldandy:

• Biryńǵaı dıstrıbıýtor saqtaý qyzmetterin satyp alýǵa bastama jasap, konkýrs 1 tamyzǵa deıin aıaqtalady dep josparlanýda; • Seriktestiktiń logıstıka basqarmasyna, Aqmola oblystyq Densaýlyq saqtaý basqarmasyna jáne «STOFARM» JShS-ne shuǵyl jáne josparly jetkizilimder arasyndaǵy tepe-teńdikti saqtaý mehanızmin ázirleý tapsyryldy; • qazirgi ýaqytta tómen baǵalardy qaıta qaraý boıynsha UDDSU tapshylyqty joıý maqsatynda baǵalardy ózektendirý jumystaryn júrgizýde; • defıtsıtti dári-dármekter boıynsha úsh jyldyq qajettilikti tikeleı óndirýshilerden nemese BUU-nyń halyqaralyq uıymdary arqyly satyp alý usynysymen Densaýlyq saqtaý mınıstrligine hat joldandy; • jetkizý kólemin arttyrý jáne jetkizýshiler úshin tartymdylyǵyn joǵarylatý maqsatynda TMU elderimen biriktirilgen satyp alýlar júrgizý múmkindigi qarastyrylýda; • «SQ-Farmatsııa» JShS óńirlik ókilderiniń Densaýlyq saqtaý basqarmasynyń aptalyq jınalystaryna qatysýy jáne sol mekemede turaqty ornalasýy jóninde sheshim qabyldandy.

Talqylaý barysynda aıtylǵan barlyq usynystar Densaýlyq saqtaý basqarmasymen, medıtsınalyq uıymdarmen jáne patsıenttik qaýymdastyqtarmen tyǵyz baılanysta turaqty baqylaýda bolady. Kompanııa dári-dármekpen tegin qamtamasyz etý sapasyn arttyrý, logıstıka kestesin naqty jáne turaqty júrgizý, medıtsınalyq uıymdarmen tıimdi jumys júrgizý jáne protsessterdiń ashyqtyǵyn nyǵaıtý jumystaryn jalǵastyrady.

Aıta ketelik dári-dármekti saraptaý ulttyq ortalyǵynyń qyzmetine tekseris júretini týraly jazǵan edik.