«Lıverpýl» klýbynyń jankúıerlerin kólik basyp ketti

ASTANA. KAZINFORM – Aǵylshyn Premer-lıgasyndaǵy jeńisti atap ótip jatqan «Lıverpýl» fýtbol klýbynyń jankúıerler tobyn kólik basyp ketti. Oqıǵa Lıverpýl qalasynyń ortalyǵynda oryn alǵan. Bul týraly Euronews habarlady.

— Búgin, dúısenbi, 26 mamyr kúni keshki saǵat 18.00 shamasynda Ýoter-strıt kóshesinde kólik birneshe jaıaý júrginshini qaǵyp ketti degen habar aldyq, — delingen polıtsııa málimdemesinde.

Polıtsııanyń aıtýynsha, kólik birden oqıǵa ornynda toqtatylǵan, al júrgizýshi tutqyndalǵan.

— Oqıǵa ornynda shuǵyl qyzmet ókilderi jumys isteýde. Jańa málimetter túsken saıyn habarlap otyramyz, — dep málimdedi quqyq qorǵaý organdary.

Aıta keteıik, dál osy dúısenbi kúni «Lıverpýl» fýtbol klýby jeńisine oraı qala ishinde avtobýspen sherý ótkizgen bolatyn. Myńdaǵan jankúıer súıikti komandasyn qarsy alýǵa jınalǵan.

Eske sala ketsek, buǵan deıin Vankýverdegi festıvalde kólik soqtyǵysýy saldarynan birneshe adam kóz jumǵan bolatyn.