Lıvanǵa jasalǵan shabýyl: AQSh Taıaý Shyǵystaǵy áskerı kontıngentin kóbeıtti

ASTANA. KAZINFORM – AQSh kúshin nyǵaıtý úshin Taıaý Shyǵysqa «shaǵyn qosymsha áskerı kontıngent» jiberip jatyr. 

Euronews-tiń jazýynsha, Pentagon bul máselege qatysty "AQSh Taıaý Shyǵysqa qosymsha áskerı kúsh jiberedi" dep málimdegen. 

Kommersant-tyń taratqan málimetine saı, Qorǵanys mınıstrliginiń ókili Patrık Raıder AQSh Taıaý Shyǵysqa shaǵyn qosymsha kontıngent jiberip jatqanyn aıtqan. 

"Saqtyq maqsatynda biz aımaqtaǵy kúshimizdi arttyrý úshin AQSh áskerleriniń shaǵyn qosymsha kontıngentin jiberip jatyrmyz», - dedi Patrık Raıder. 

Spıker sarbazdardyń sany kóbeıdi me, álde áskerı tehnıka sany artty ma, ol jaǵyn naqtylaýdan bas tartty.

Ol qaýipsizdikti saqtaý maqsatynda tilshilerdiń ózge suraqtaryna jaýap berýden bas tartty. 

23 qyrkúıekte Izraıl Lıvandaǵy «Hezbolla» nysandaryna jappaı soqqy berdi. 

Sol kúni keshke Izraıl qorǵanys mınıstri Ioav Galant Lıvanda «Soltústiktiń jebeleri» dep atalatyn shabýyl operatsııasyn jarııalady. 

Izraıl premer-mınıstri Bınıamın Netanıahý jergilikti turǵyndardy «Hezbolla» nysandarynan alys ketýge shaqyrdy.

23 qyrkúıekte Izraıldiń «Hezbolla» nysanalaryna jasaǵan aýqymdy soqqylarynan 300-ge jýyq adam, sonyń ishinde áıelder men balalar qaza tapqany málim boldy. 

Qaqtyǵys 17 jáne 18 qyrkúıekte Lıvanda bolǵan baılanys qurylǵylarynyń jarylystarynan keıin bastaldy. Onda ondaǵan adam qaza taýyp, 3 myńǵa jýyq adam jaraqat aldy.