Lıvan óz jerinde Izraıl áskerıleriniń bolýyn okkýpatsııa dep atady
ASTANA. KAZINFORM — Izraıl kelisim aıasynda Lıvannan barlyq derlik áskerin shyǵardy, biraq bes pozıtsııada qaldyrdy. Lıvan muny okkýpatsııa dep atady, dep habarlaıdy VVS.
Qarasha aıynda Beırýtpen qol qoıylǵan bitimgershilik kelisimge sáıkes Izraıl Lıvan aýmaǵynan tolyqtaı shyǵýǵa mindetteme alǵanyna qaramastan, Lıvannyń ońtústigindegi bes aýdanda áskerin qaldyrýdy sheshti.
Lıvan qazirdiń ózinde Izraıldiń óz jerinde kez kelgen áskerdiń bolýyn okkýpatsııa dep sanaıtynyn málimdeýge asyqty.
27 qarashada Lıvan men Izraıl arasyndaǵy atysty toqtatý kelisimi kúshine endi.
Kelisim aıasynda Izraıl Lıvannyń ońtústik bóligindegi áskerin 60 kún ishinde shyǵarýy tıis edi. Keıinnen shekti merzim 18 aqpanǵa deıin uzartyldy.
«Hezbolla» da sol merzim ishinde aımaqty tastap, onyń ornyna Lıvan áskeri kelýi kerek edi.
TsAHAL ókili, podpolkovnık Nadav Shoshanı aıtqandaı, «Izraıl soltústik shekarasynda tikeleı qaýip joq ekenine senimdi bolýy úshin» ázirge Lıvandaǵy beketterinde qalady.
— Biz atysty toqtatý týraly kelisimin ustanamyz. Bul jaqsy protsess dep sanaımyz, — dep qosty ol.
Sońǵy birneshe kúnde Izraıl Lıvandaǵy eldi mekenderden áskerlerin shyǵardy. Lıvan seısenbi kúni tańerteń eldiń ońtústiginde jańa áskerin ornalastyratynyn jarııalady.
VVS atap ótkendeı, ótken aptada AQSh TsAHAL áskerılerine Lıvannyń ońtústigindegi bes strategııalyq jerde qalýyna ruqsat berdi, biraq olardyń sonda qansha ýaqyt qalatyny ázirge belgisiz.
Izraıl áskeri soltústik Izraıl eldi mekenderi kórinip turatyn birneshe pozıtsııany anyqtady.
Izraıl Lıvan úkimetin áskerin Lıtanı ózeniniń ońtústigine — Izraıl de, «Hezbolla» da ketýi tıis aımaqqa durys ornalastyrmaý arqyly atysty toqtatý kelisiminiń bir bóligin oryndamady dep aıyptady.
Izraıl áskerıleri «Hezbolla» Lıtanı ózeniniń arǵy jaǵyna tolyǵymen shyǵyp ketpegenshe jáne Izraıldiń saıası basshylyǵy oǵan aımaqty tastap ketýdi buıyrmaıynsha óz oryndarynda uzaq ýaqyt qalýǵa daıyn ekenin málimdedi, dep jazdy The Times of Israel.
Lıvan basshylary Izraıldiń bul josparyna narazylyǵyn ashyq túrde bildirdi.
Lıvan óz jerinde Izraıldiń kez kelgen bolýyn okkýpatsııa dep sanaıdy jáne áskerdi ketýge májbúrleý úshin barlyq quraldy qoldanýǵa quqyly, dep málimdedi dúısenbi kúni Lıvan prezıdentiniń baspasóz hatshysy.
Lıvan bıligi sondaı-aq BUU Qaýipsizdik Keńesine Izraıldi tez arada aýmaqty tastap ketýge májbúrleý úshin ótinish joldaıtynyn ýáde etti.
Lıvan parlamentiniń spıkeri Nabıh Berrı ótken beısenbide AQSh ony Izraıldiń jospary týraly habardar etkenin, ol óz eli atynan bas tartqanyn málimdedi.
— Men áskerdi shyǵarý kezeńin uzartýdyń qandaı da bir merzimi týraly aıtýdan bas tarttym. Áskerdi shyǵarý úshin jaýapkershilik amerıkalyqtardyń moınynda, — dep keltirdi Lıvannyń NNA resmı aqparat agenttigi Berrıdiń sózin.
Ol eger Izraıl Lıvannyń ońtústiginde qalatyn bolsa, bul «ızraıldikterdiń Lıvanda qozǵalys erkindigi men agressııasyn qoldanatynyn bildiredi jáne bul qabyldanbaıdy» dep qosty.
Izraıl qorǵanys kúshteri (TsAHAL) Lıvannyń ońtústigindegi shııt «Hezbolla» sodyrlary qaıta bas kóterýine jol bermeý úshin bes pozıtsııada qalady. TsAHAL ol jerlerde qansha ýaqyt bolatyny ázirge belgisiz.