Lıtvada «Uly dala áıelderi» kórmesi ashyldy
Atalmysh shara Qazaqstannyń Lıtvadaǵy Elshiligi, QR Ortalyq memlekettik kınofotoqujattar jáne dybys jazbalar muraǵatynyń, sondaı-aq «Women of Kazakhstan» ÚEU Qazaqstan áıelderi vırtýaldy mýzeıiniń qoldaýymen el Táýelsizdiginiń 30 jyldyǵyna arnaldy.
Lıtva jurtshylyǵynyń nazaryna tarıhtyń ártúrli kezeńderinde ulttyq mádenıettiń, ónerdiń, ǵylymnyń, saıasattyń jáne sporttyń damýyna óz úlesin qosqan Qazaqstan halqynyń kórnekti ókilderiniń sýretteri usynyldy.
Kórmeni ashqan Qazaqstan Elshisi Vıktor Temirbaev el táýelsizdiginiń qalyptasýyndaǵy áıelderdiń baǵa jetpes rólin atap ótip, olardy Qazaqstan halqynyń basty baılyqtarynyń biri dep atady.
Sonymen qatar, dıplomat jınalǵan qonaqtardy áıelderdiń ekonomıkaǵa, saıasatqa, qoǵamdyq qyzmetke qatysýyn keńeıtý jónindegi memleketimizdiń júıeli sharalarymen tanystyrdy. Prezıdenti Qasym-Jomart Toqaevtyń bastamasy boıynsha áıelder men jastar úshin parlamenttik saılaýda olardyń kandıdattarynyń partııalyq tiziminde 30 paıyzdyq kvota engizilgenin atap ótti.
Ashylý rásimi barysynda Elshilik Lıtvada ǵulama ǵalym ári fılosof ál-Farabıdiń 1150 jyldyǵyn jáne uly aqyn ári oıshyl Abaı Qunanbaıulynyń 175 jyldyǵyn merekeleýge belsendi qatysqan Lıtva qaıratkerlerine Memleket basshysynyń jáne Mádenıet jáne sport mınıstriniń atynan alǵys hattardy tabys etti.
2020 jyldyń barysynda Lıtvada ulttyq qaýymdardyń úıinde ál-Farabı ortalyǵy jáne Vılnıýs okrýginiń qoǵamdyq kitaphanasynda Abaı atyndaǵy oqý zaly ashyldy. Sonymen qatar, Á. Álimjanovtyń «Ustazdyń oralýy» povesi lıtva tiline aýdarylyp, M. Áýezovtiń «Abaı joly» roman-epopeıasy qaıta basylyp shyǵaryldy.
«Qazaq ýnıversıteti» baspasynan shyqqan ál-Farabı men Abaıǵa arnalǵan Kitaptar óńirdegi eń iri «Vilnius Book Fair» kitap jármeńkesiniń aıasynda tanystyryldy. Sonymen qatar, Lıtvadaǵy toǵyzqumalaqt qazaq ulttyq zııatkerlik oıyny boıynsha kezekti jarys Abaıdyń mereıtoıyna arnaldy.
