Lıtva Energetıkalyq hartııa sharty quramynan resmı túrde shyqty

ASTANA. KAZINFORM — Lıtva energetıka salasyna ınvestıtsııalardy qorǵaýǵa baǵyttalǵan halyqaralyq kelisim — Energetıkalyq hartııa shartyna qatysýdan shyǵý týraly sheshim qabyldady, dep habarlaıdy Anadoly.

LETA taratqan aqparatqa sáıkes, sheshimdi eldiń parlamenti — Seım maquldady. 99 depýtat «qoldap» daýys berdi, qarsy daýys bergen eshkim bolmady, al eki depýtat qalys qaldy.

Lıtva Energetıka mınıstrliginiń málimdeýinshe, shartqa qatysýdyń qazirgi jaǵdaıda mańyzy joq, ásirese eger Eýropalyq Odaq elderiniń basym bóligi odan bas tartyp jatqan jaǵdaıda.

Lıtva bul shartqa 1995 jyly qol qoıyp, ony 1998 jyly resmı túrde bekitken bolatyn.

1994 jyly qabyldanǵan bul shartqa Eýropa men Ortalyq Azııanyń 47 memleketi qosylǵan. Sharttyń basty maqsaty — energetıka salasyndaǵy sheteldik ınvestıtsııalardy, ásirese postkeńestik keńistikte, qorǵaý.

Alaıda sońǵy jyldary bul shart klımattyq saıasatpen, sonyń ishinde Eýropalyq jasyl kelisim men Parıj kelisimimen úılespeıtindigi úshin synǵa ushyrady. 2024 jyly EO Keńesi Eýroodaq pen «Evratom» qaýymdastyǵynyń sharttan shyǵýyn maquldaǵan bolatyn.

Búgingi kúnge deıin bul sharttan Italııa, Frantsııa, Germanııa, Polsha, Slovenııa, Lıýksembýrg, Portýgalııa, Ispanııa, Ulybrıtanııa shyǵyp ketken. Nıderlandy 2025 jyldyń maýsym aıynyń sońynda resmı túrde shyǵady dep josparlanǵan.

Buǵan deıin Lıtva resmı túrde Ottava konventsııasynan shyqqany anyqtaldy.