Lıssabondaǵy tergeý: aqaýly symarqan jáne basqa da buzýshylyqtar anyqtaldy

ASTANA. KAZINFORM – Qyrkúıek aıynyń basynda Lıssabonda «Glorııa» fýnıkýleriniń apaty sebepterin zerttep jatqan sarapshylar aldyn ala esebinde tehnıkalyq qyzmet kórsetý boıynsha birqatar buzýshylyqtardy atady, dep habarlaıdy Kazinform VVS-ge silteme jasap.

Aldyn ala málimetke súıensek, apatqa tartqysh symarqannyń úzilýi sebep bolǵan. Portýgalııanyń Avıatsııalyq jáne temirjol apattarynyń aldyn alý jáne tergeý basqarmasynyń (GPIAAF) málimdeýinshe, fýnıkýler symarqany aqaýly bolǵan jáne jolaýshylar tasymaly úshin sertıfıkattalmaǵan. 

– Symarqan Gloria tramvaıynda paıdalaný úshin CCFL-diń qazirgi talaptaryna sáıkes kelmedi, – delingen 35 bettik esepte.

Esepte sondaı-aq symarqannyń tehnıkalyq jaǵynan jaramsyz bolǵany jáne ony 2022 jyly Lıssabonnyń tramvaı jáne fýnıkýler operator-kompanııasy Carris satyp alǵany aıtylǵan. Carris ınjenerleri kabeldiń jaǵdaıyn qadaǵalamady jáne qaýipsizdik ınspektsııasyn júrgizbedi, dep qorytyndylady mamandar.

Kompanııa fýnıkýler men tramvaılarǵa tehnıkalyq qyzmet kórsetý bóliminiń basshysyn jumystan shyǵarǵanyn málimdedi. 

Symarqan jaramsyzdyǵy – anyqtalǵan jalǵyz másele emes. Kabel úzilgen kezde fýnıkýler júrgizýshisi paıdalanbaq bolǵan apattyq tejeý júıesi tıisti jáne der kezinde iske qosylmady, ári aldyn ala synaqtan ótpegen. Basqarma ázirge jınalǵan aqparattyń «tolyq emes» ekenin jáne tergeý ary qaraı jalǵasatynyn atap ótti.

Qorytyndy esep kelesi jyly shyǵady dep kútilip otyr.

Eske sala ketsek, qyrkúıek aıynyń basynda Lıssabonda týrıster arasynda tanymal «Glorııa» fýnıkýleri relsten shyǵyp ketti.

Portýgalııa bıligi kóptegen adam qaza taýyp, jaraqat alǵan «Glorııa» fýnıkýlerindegi apatqa baılanysty ulttyq aza tutý kúnin jarııalady.

Apattan qaza tapqandardyń basym bóligi shetel azamattary edi.

Aıta ketsek, «Glorııa» fýnıkýleri – Portýgalııa astanasynyń tólqujatyndaı sanalady jáne eldiń ulttyq eskertkishi retinde tanylǵan.