Іle Alataýyn mekendeıtin ilbister vıdeoǵa túsip qaldy

ASTANA. KAZINFORM — Іle Alataýy shatqaldarynda tirshilik etetin qar barystary ulttyq park pen Zoologııa ǵylymı-zertteý ınstıtýty mamandarynyń udaıy baqylaýynda. 

Jyl saıyn mamandar kúz aılary men kóktemniń aıaǵyna deıin 2000 metr bıiktiktegi qar barysy júretin soqpaqtar men jartastarǵa fototuzaq ornatý arqyly monıtorıng júrgizedi.  

Eske sala keteıik, Qazaqstanda qar barysynyń sany turaqty túrde ósip keledi. Búginde elimizde shamamen 190 ilbis bar.

Ekologııa jáne tabıǵı resýrstar mınıstrligi, sonymen qosa qar barysyn qorǵaýmen aınalysyp júrgen mamandardyń qoldaýymen elimizdegi erekshe qorǵaýǵa alynǵan 15 aýmaqta barlyq jaǵdaı jasaldy. 

Qazirgi tańda ulttyq tabıǵı parkter men qoryqtar atalǵan janýarlar úshin qaýipsiz.

Únemi monıtorıng júrgizilip, jıi fototuzaq aýmaqtary uıymdastyrylady.

Sonyń nátıjesinde ilbisterdiń mıgratsııasyn, ómir súrý, ortaǵa beıimdelý erekshelikterine taldaý jasalady.

Qazaqstanda tuńǵysh ret qar barysyn sanaý jumysy 1978 jyly qolǵa alynǵan. Tıisinshe, 1980 jyly elimizdiń aýmaǵyn 200-ge jýyq ilbis meken etkeni anyqtaldy.

Sol kezeńde qar barysy Qazaqstannyń Qyzyl kitabyna engizildi. 1990-shy jyldardan bastap olardyń sany aıtarlyqtaı qysqardy.

Keıingi ýaqytta ilbisterge arnalǵan ekojúıeni jaqsartý esebinen olardyń qatary artty.

Sońǵy 3-5 jyldaǵy qar barysynyń ortasha jyldyq ósimi — 5-6 bas.