Lazer nemese dron arqyly ushqyshtarǵa kedergi keltirý — endi qylmys

ASTANA. KAZINFORM — Qazaqstanda ushqyshtarǵa lazerlik qurylǵylar men ushqyshsyz ushý apparattarymen kedergi keltirgeni úshin qylmystyq jaza engizildi, dep habarlaıdy Bas prokýratýranyń baspasóz qyzmeti.

Vedomstvo atap ótkendeı, ushqyshtardy lazerlik qurylǵylarmen kózden shaǵylystyrý óte qaýipti. Mundaı áreketter ushý qaýipsizdigine tikeleı qater tóndiredi, ásirese ushaqtyń ushyp kóterilýi men qonýy sııaqty asa mańyzdy kezeńderde.

— Lazer sáýlesi ushqyshtyń ýaqytsha kórý qabiletinen aıyrylýyna sebep bolýy múmkin. Bul — áýe apatyna ákelip soqtyratyn jaǵdaı. Qazaqstannyń avıatsııalyq qyzmetteriniń deregine súıensek, sońǵy 6 jyl ishinde jolaýshylar laınerleri ekıpajynyń lazer sáýlesinen kóz janarynan aıyrylýynyń 98 oqıǵasy tirkelgen. Olardyń basym bóligi Almaty halyqaralyq áýejaıynda bolǵan, — delingen habarlamada.

Máselen, 2017 jyly mundaı 8 jaǵdaı tirkelse, 2023 jyly olardyń sany 30-ǵa jetken.

Buǵan deıin otandyq zańnamada bul áreketter úshin arnaıy jaýapkershilik qarastyrylmaǵan edi, sondyqtan kinálilerdi jaýapqa tartý aıtarlyqtaı qıyndyq týdyrdy.

Aıta keterligi, Aýstralııa, Germanııa, Jańa Zelandııa, Kanada jáne AQSh syndy elderde ushqyshty lazerlik qurylǵymen soqyr etý — 10 jylǵa deıin bas bostandyǵynan aıyrý jazasy qarastyrylǵan aýyr qylmys retinde tanylady.

— Endi bul jaǵdaı Qazaqstanda da ózgerdi. Osy jyldyń 16 shildesinde qabyldanǵan zańǵa sáıkes, Qylmystyq kodekske jańa 352-1-bap engizildi. Onda lazerlik qurylǵylar men ushqyshsyz ushý apparattaryn paıdalana otyryp, áýe kemesin basqarýǵa kedergi keltirý — qylmystyq jaýapkershilik retinde belgilendi, — dep túsindirdi vedomstvo.

Jaza árekettiń saldaryna qaraı jeńil nemese aýyr bolýy múmkin:

• aıyppul salýdan bastap,

• qamaýǵa alý nemese

• 10 jylǵa deıin bas bostandyǵynan aıyrý jazasyna deıin qarastyrylǵan.

Prokýratýra bul ózgeristi kólik salasyndaǵy qylmystardyń aldyn alý jáne qoǵamdyq qaýipsizdikti qamtamasyz etý baǵytyndaǵy mańyzdy qadam retinde baǵalaıdy.

— Mundaı áreketter — eshqandaı jaǵdaıda «zııansyz ázil» nemese jaı ǵana «erikkenniń ermegi» emes. Bul — ondaǵan, tipti júzdegen adamnyń ómiri men densaýlyǵyna qater tóndiretin óreskel zań buzýshylyq, — dep atap ótti Bas prokýratýra.

Prokýratýra óz quzyreti sheginde jazanyń bultartpastyǵyn qamtamasyz etý jáne mundaı quqyq buzýshylyqtardyń aldyn alý úshin barlyq qajetti sharalardy qabyldaıtyn bolady.

Osydan buryn ǵarysh jáne ushqyshsyz júıeler salasyndaǵy yntymaqtastyq máseleleri talqylanǵan edi.