Latyn grafıkasyna kóshý - tildiń álemdik mádenıetke jaqyndaýynyń alǵashqy qadamy - sarapshylar

ASTANA. QazAqparat - 21 qyrkúıekte «Rýhanı jańǵyrý» baǵdarlamasyn qazaq tilin latyn qarpine kóshirý turǵysynan talqylaý boıynsha sarapshylar kezdesýleri serııasynan ІІІ Óńirlik dóńgelek ústel ótti, dep habarlady búgin primeminister.kz.

Іs-sharanyń uıymdastyrýshysy Eýrazııalyq ıntegratsııa ınstıtýty boldy.

Instıtýt dırektory Ǵanı Nyǵymetov dóńgelek ústelge qatysýshylarǵa arnap sóılegen sózinde atqarýshy bılik, dıalog rejımindegi «Rýhanı jańǵyrý» jobalyq keńsesiniń jumysyn retteý, ǵylymı-saraptama qaýymdastyǵymen turaqty pikir jáne aqparat almasýdyń mańyzdylyǵyn basa aıtty.

Aqtóbe oblysynda baǵdarlamany iske asyrý barysy týraly ákimdiktiń ishki saıasat basqarmasy basshysynyń orynbasary, «Rýhanı jańǵyrý» jobalyq keńsesiniń basshysy Ermek Taýanov aıtyp berdi.

Fılologııa ǵylymdarynyń kandıdaty, Q. Jubanov atyndaǵy AMÓÝ teorııa jáne praktıkalyq til bilimi kafedrasynyń dotsenti Nurbol Sádýaqas óz sózinde latyn álipbıine kóshý der kezinde júrgizilip jatqanyn jáne dáýirdiń jańa syn-tegeýrinderine jaýap beretinin atap ótti. Bul ustanym fılologııa ǵylymdarynyń kandıdaty Muhtar Mırovtyń sózinen kórinis tapty.

M. Mırov latyn grafıkasyna kóshý tildiń álemdik mádenıetke jaqyndaýynyń alǵashqy qadamy ekenin basa aıtty.

Fılologııa ǵylymdarynyń doktory Sabyrjan Muhtarov álipbıdi reformalaý kezinde álemdik tájirıbeni zertteýdiń mańyzdylyǵyna nazar aýdardy.

Professor, tarıh ǵylymdarynyń doktory Nurtaza Abdollaevtyń pikirinshe, latyn álipbıine kóshý - ulttyń odan ári damýy úshin tarıhı qadam jáne Qazaqstannyń jetistikterin álemge taratý jáne translıatsııalaý múmkindigi.
Dóńgelek ústel jumysynyń nátıjesi boıynsha usynystar jasaldy, olar baǵdarlamany iske asyrýǵa jaýapty múddeli memlekettik organdarǵa jiberiledi.

Dóńgelek ústel jumysyna oblystyń ǵylymı-saraptama qaýymdastyǵynyń, ÚEU jáne JAO-nyń 40-tan astam ókilderi qatysty.