Latyn álipbıine kóshý shet tilderdi úırenýge jol ashady - stýdent Marııa Shıronova

ALMATY. QazAqparat - Almatynyń stýdentteri men oqytýshylar qaýymy qazaq tilin latyn álipbıine kóshirý máselesine qoldaý bildirdi. Búgin Almatydaǵy Ortalyq Azııa ýnıversıtetinde atalǵan másele aıasynda jıyn ótkizilip, latyn álipbıine kóshýdiń artyqshylyqtary baıandaldy, dep habarlaıdy QazAqparat tilshisi.

«Qazaqstandaǵy mańyzdy taqyryptyń biri latyn álipbıine qazaq tilin kóshirý máselesi dep esepteımin. Latyn álipbıinde atalarymyz 1940 jyldardyń ortasyna deıin jazyp kelgen. Bizge latyn tańsyq emes. Elbasy «Bolashaqqa baǵdar: Rýhanı jańǵyrý» maqalasynda «Eki dáýir túıisken óliara shaqta Qazaqstanǵa túbegeıli jańǵyrý jáne jańa ıdeıalar arqyly bolashaǵyn baıandy ete túsýdiń teńdessiz tarıhı múmkindigi berilip otyr. Men barsha qazaqstandyqtar, ásirese, jas urpaq jańǵyrý jónindegi osynaý usynystardyń mańyzyn tereń túsinedi dep senemin. Jańa jaǵdaıda jańǵyrýǵa degen ishki umtylys - bizdiń damýymyzdyń eń basty qaǵıdasy. Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi», degen bolatyn. Bizdiń rýhanı jańǵyrýymyzdyń basy osy tildiń jańǵyrýynda», - deıdi Ortalyq Azııa ýnıversıtetiniń ǵylym jónindegi prorektory Nurjan Maqsatov.

Stýdentter arasynan sóz alǵan Marııa Shıronova qazaq tilin latyn álipbıine kóshirý máselesiniń jastar arasynda qyzý talqylanyp jatqanyn aıtty.

«Latyn álipbıine kóshýdiń artyqshylyǵy kóp, halyq arasynda tilge degen jańa kózqaras oıanady dep senemin. Shet tilderin úırenýde kómegin tıgizedi. Jalpy stýdentter latynǵa kóshýdi qoldaıdy. Qazaqstan prezıdenti «Bolashaqqa baǵdar: rýhanı jańǵyrý» maqalasynda: «Latynshaǵa kóshýdiń tereń logıkasy bar. Bul qazirgi zamanǵy tehnologııalyq orta¬nyń, kom¬mýnıkatsııanyń, sondaı-aq, HHІ ǵasyr-daǵy ǵyly¬mı jáne bilim berý protsesiniń erekshe¬lik¬terine baılanysty. Mektep qabyrǵasynda balalarymyz aǵylshyn tilin oqyp, latyn áripterin onsyz da úırenip jatyr. Sondyqtan, jas býyn úshin eshqandaı qıyndyq, kedergiler bolmaq emes», degen bolatyn. Biz úshin bul asa qıyndyq týǵyzbaıdy», - dedi Marııa Shıronova.

Atalǵan oqý ornynyń oqytýshysy, bıologııa ǵylymdarynyń ǵandıdaty Erseıit Begaıylov ákesiniń latyn álipbıinde saýat ashqanyn, ol úshin latyn áripterimen jazý qıynǵa soqpaıtynyn aıtty.

«Qazaq tilin latynǵa kóshirý máselesi burynnan aıtylyp keledi. Halyq arasynda talqylandy. Stýdentter arasynda nasıhattaldy, jastardan tek qoldap otyr. Meniń ákem latyn árpimen hat jazatyn, men ony kishkentaı kezimnen bilemin, esh qıyndyǵy joq», - dedi JOO ǵalymy Erseıit Begaıylov.

Aıta keteıik, Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda: «Qazaq tilin latyn álipbıine kóshirý jumystaryn bastaýymyz kerek. Biz bul máselege neǵurlym dáıektilik qajettiligin tereń túsinip, baıyppen qarap kelemiz jáne oǵan kirisýge Táýelsizdik alǵannan beri muqııat daıyndaldyq», degen bolatyn.