Latyn álipbıin qazaq tiliniń áýezine qaraı tańbalaýymyz qajet - Ǵarıfolla Esim

ASTANA. QazAqparat - Qoǵam qaıratkeri, akademık Ǵarıfolla Esimniń aıtýynsha, latyn álipbıin engizgende qazaq tiliniń áýezdiligine basa nazar aýdarý qajet. Sebebi fonetıka arqyly tańbalar jattalady, dep habarlaıdy QazAqparat tilshisi.

«Dál qazir biz latyn álipbıiniń artyqshylyǵyn sezbeı otyrǵan shyǵarmyz. Alaıda ony qabyldaǵannan keıin basqasha oılaı bastaımyz, dúnıeni basqasha qabyldaımyz, ózge halyqtarmen aradaǵy baılanysymyz jańa deńgeıge kóteriledi. Negizi, qazirgi kezde bárimiz de latyn áripterin jaqsy bilemiz. Aǵylshynsha oqydyq, nemisshe oqydyq, frantsýzsha oqydyq, bári - latyn. Endigi másele, latyn álipbıin qazaq tiliniń fonetıkasyna, áýezine qaraı tańbalaýymyz qajet. Sonda biz óz tilimizdiń áýezdiligin joǵaltpaımyz», - dedi Esim búgin «Keleshektiń kilti - latyn álipbıi» atty «dóńgelek ústeldiń» otyrysynda.

Ǵalymnyń aıtýynsha, latyn álipbıin qabyldaǵannan keıin kásibı mamandar árbir áripti halyqtyń sanasyna quıa bilýi kerek. Sonda ony tezdetip engizýge bolady. «Qazir Elbasydan bastap elde otyrǵan aǵaıynǵa deıin áreket jasaýymyz qajet. Sebebi latyn álipbıi - ol mádenı qozǵalys, rýhanı qozǵalys. Sebebi erteń sonymen sóıleımiz, sonymen jazamyz, sonymen júremiz», - dep atap kórsetti Ǵarıfolla Esim.

Aıta keteıik, búgingi jıynǵa professor Ádil Ahmetov te qatysty. Ǵalymdar mektep oqýshylaryna latyn álipbıiniń tıimdiligin jan-jaqty túsindirip berdi.