Latyn álipbıi joǵymyzdy túgendep, joǵaltqanymyzdy tabýǵa septigin tıgizedi - ǵalym

ShYMKENT. QazAqparat - Latyn álipbıi - zaman talaby. Búgingi tańda onyń mańyzy asa zor. Jańa tehnologııa da, bolashaq ınnovatsııa da latyn tilinde. Endeshe kóshten kesh qalmaýymyz úshin barlyǵymyz atsalysýymyz qajet. Búgin OQO óńirlik kommýnıkatsııalar qyzmetinde ótken brıfıngte ǵalym Aqjol Qalshabek osylaı málimdedi.

Memleket basshysy aǵymdaǵy  2017 jyldyń 27 qazanynda qazaq tili álipbıin kırıllıtsadan latyn grafıkasyna kóshirý týraly Jarlyqqa qol qoıdy. Jarlyq negizinde 2025 jylǵa deıin latyn grafıkasyna kóshý kezeń-kezeńimen júzege asyrylatyn bolady. Osyǵan baılanysty ótken baspasóz máslıhatynda jan-jaqty pikirler aıtylyp, talqyǵa salyndy.

Jańa álipbıge kóshý týraly óz oıyn ortaǵa salǵan ǵalym Aqjol Qalshabek latyn álipbıi qazaq halqynyń ulttyq rýhyn jańǵyrtatynyn aıtty.

«Elbasymyzdyń «Bolashaqqa baǵdar: Rýhanı jańǵyrý» maqalasynda halqymyzdyń ulttyq kodyn aıqyndaý, «Týǵan jer», «100 jańa esim» syndy ózekti taqyryptar qamtylǵan bolatyn. Osylardyń ishinde eń mańyzdysy latyn álipbıine kóshý máselesi edi. Latyn álipbıi joǵymyzdy túgendep, joǵaltqanymyzdy tabýǵa úlken septigin tıgizedi dep esepteımin. Osy rette búgingi qazaq qoǵamy latyn álipbıin tez meńgerýge daıyn bolýy kerek», - dedi Aqjol Qalshabek.
 

Sonymen qatar, brıfıngte sóz alǵan QR ózbekteri «Dostyq» qaýymdastyǵynyń tóraǵasy Ikram Hashımjanov  Qazaqstandaǵy ózge etnos ókilderi de latyn álipbıine kóshý bastamasyn qoldaıtyndyǵyn jetkizdi.

«Búginde álem halqynyń 4 mlrd. 300 mıllıonǵa jýyǵy latyn álipbıin qoldanady. Óıtkeni, latyn tili ejelden ǵylym men bilim tili sanaldy.  Demek, bul - búgingi zamannyń talaby. Bolashaq urpaq latyn álipbıi arqyly tereń bilim alyp, ǵylymǵa umtylýy tıis», - dedi Ikram Akramuly.
 

Sondaı-aq, baspasóz máslıhatynda latyn álipbıiniń túrki halyqtarynyń basyn biriktiretin mańyzdy faktor ekendigi aıtyldy.