Latvııa Shvetsııamen aradaǵy sýasty kabeliniń zaqymdalǵanyn habarlady

ASTANA. KAZINFORM – Jeksenbi kúni Latvııa bıligi «Latvııa memlekettik radıo jáne televıdenıe ortalyǵyna» (LVRTC) tıesili sý astyndaǵy optıkalyq-talshyqty kabeldiń zaqymdalǵanyn habarlady, dep habarlaıdy Kazinform menshikti tilshisi.

- LVRTC derekterdi berý monıtorıngi júıesi Ventspıls-Gotland (Foresýnd) ýchaskesinde derekterdi berý qyzmetin kórsetýdegi úzilisterdi tirkedi. LVRTC balama derekter joldary arqyly qyzmet kórsetýdi jalǵastyryp jatyr. Qazirgi ýaqytta derekterdi berý jyldamdyǵynda kidiris bolýy múmkin, biraq bul negizinen Latvııadaǵy sońǵy paıdalanýshylarǵa áser etpeıdi, - delingen memlekettik radıo jáne teledıdar ortalyǵynyń málimdemesinde. 

Belgili bolǵandaı, kabel 50 metrden astam tereńdikte jatyr, zaqymdanýdyń naqty sıpatyn kabeldi jóndeý jumystary bastalǵannan keıin ǵana anyqtaýǵa bolady.

Jeksenbide premer-mınıstr Evıka Sılınıa LVRTC basqaratyn Ventspıls-Gotland ýchaskesindegi talshyqty-optıkalyq baılanys jelisiniń jumysyndaǵy úzilisterge qatysty jaýapty mınıstrlikter men vedomstvolarmen keńes ótkizdi.

Qazirgi ýaqytta LVRTC jóndeý kemesiniń teńizge shyǵýynyń naqty ýaqytyn aıta almaı otyr, biraq zaqymdanýdy múmkindiginshe tezirek jóndeý úshin jumys istep jatqanyn atap ótti.

Óz kezeginde Latvııa teńiz kúshteri yqtımal tartylǵan kemeni tekserý úshin dereý patrýldik keme jiberdi. Áskerı-teńiz kúshteri NATO-daǵy odaqtastarymen, sonyń ishinde Shvetsııamen de baılanysyp, únemi aqparat almasýdy qamtamasyz etti.

Eýrokomıssııa tóraıymy Ý.Lıaıen Baltyq jaǵalaýy elderimen yntymaqtastyǵyn bildirdi. Ol mańyzdy ınfraqurylymnyń turaqtylyǵy men qaýipsizdigi Eýropalyq Odaq úshin basymdyq ekenin atap ótti.

Buǵan deıin Baltyq teńiziniń túbinde taǵy kabel aqaýy anyqtalǵanyn jazǵan bolatynbyz.