Latıpsha Asanov: Berekeli birlik – bárin jeńbek

NUR-SULTAN. QazAqparat - 1991 jyldan beri eldiń berekeli birligi men yrysty yntymaǵyn jarastyrý baǵytynda qolǵa alynǵan ıgi bastamalardyń durystyǵyn «Egemen Qazaqstan» gazetinde jaryq kórgen maqalasynda Elbasy taǵy bir dáleldedi, deıdi Shymkent qalasy QHA túrik etnomádenı birlestiginiń tóraǵasy, kásipker, Qoǵamdyq kelisim keńesiniń múshesi Latıpsha Asanov.

QR Tuńǵysh Prezıdenti búkil jer-jahan alańdap, ult saýlyǵy synǵa túsken kezde barshamyzdy sabyrǵa shaqyryp, óziniń tileýles ekendigin aıtty. Aty jaman vırýsqa qarsy búkil adamzattyń aqyl-oıy bir maqsatqa jumylyp, tynbaı em izdep jatqanyna toqtaldy.

Qazaqstan indetti tizgindeý maqsatynda alǵashqy elderdiń qatarynda qaýipsizdikti qolǵa alyp, saqtandyrý sharalaryn ýaqtyly júrgizdi. Júıeli jumystyń arqasynda koronavırýstyń keńinen taralýyna jol berilmedi. Ahýal kún saıyn baqylanyp, jaǵdaıdy ońaltý baǵytynda kóp jumys atqaryldy. Sondyqtan jer-jerlerde júrgizilip jatqan keshendi is-sharalarǵa búkil halyq bolyp qoldaý kórsetkenimiz jón ekedigine basa toqtaldy, deıdi Latıpsha Asanov.

«Nursultan Nazarbaev búkil álemdi jaılaǵan pandemııanyń daǵdarys týǵyzyp, qozǵalysty shektegenin aıtty. Qazaqstannyń mundaı jaǵdaıǵa daıyn ekendigin «Údemeli ındýstrııalyq-ınnovatsııalyq damý» baǵdarlamasy aıasynda 1000-nan astam jańa kásiporyn ashylǵanyn jáne sonyń arqasynda básekege qabiletti ónimder shyǵaratyn jańa tehnologııalardyń Qazaqstanǵa kelgenin tilge tıek etti.

Búginde jer-jahanda qalyptasqan ahýaldyń ońaı emestigin eske salǵan Elbasy: «... osyndaı syn saǵatta septigin tıgizetin halqymyzdyń tózimdiligi, erik-jigeri jáne ózine degen zor senimi arqasynda mindetti túrde jeńip shyǵamyz. Ol úshin bizge qajetti nárse – qarjy-qarajat, materıaldyq resýrs, tehnıka, azyq-túlik – bári bar. Alańdaıtyn, abyrjıtyn esh negiz joq», dedi.

Assambleıa múshesi retinde búgingi maqaladan túıgenim mynadaı – biz bir bolsaq, judyryqtaı jumyla bilsek, barlyq qıyndyqty eńseremiz. Ol úshin el bıligi belgilegen talap-mejelerdi saqtap, tártipke bas ıgenimiz abzal. Biz bos baıbalammen emes shamamyz jetse, osyndaı qıyn shaqta kómekke muqtaj jandarǵa qol ushyn sozýǵa tıispiz jáne ózimizdiń, otbasymyz ben qoǵam músheleriniń ómirine jiti jaýapkershilikpen qaraǵanymyz jón.

Eń bastysy – tótenshe jaǵdaı rejiminde jumys istep júrgen azamattardyń syn-eskertýine qulaq asyp, qıyn shaqta tonnyń ishki baýyndaı bolǵan berekeli birligimizdi baıqatyp, iriligimizdi kórsetýge mindettimiz», - dep atap ótken Shymkent qalasy QHA túrik etnomádenı birlestiginiń tóraǵasy.

Foto: yujanka.kz