Labubu-ge qatysty dúrbeleń: Ulybrıtanııa dúkenderinde satylym maýsymǵa deıin toqtady
LONDON. KAZINFORM — Qytaılyq Pop Mart oıynshyq óndirýshisi Ulybrıtanııadaǵy dúkenderinde Labubu dep atalatyn tanymal jumsaq oıynshyqtardyń satylymyn ýaqytsha toqtatty, dep jazdy Kazinform agenttiginiń menshikti tilshisi.
Bul sheshim dúkendegi tutynýshylar arasyndaǵy tóbeles pen talastan keıin qabyldanǵan.
Labubu — Gonkong sýretshisi Kasıng Lýng jasaǵan, qoıan-monstrǵa uqsaıtyn erekshe pishindi jumsaq oıynshyqtar serııasy. Olar «soqyr qorap» formatynda satylady — ıaǵnı, satyp alýshy ishindegi naqty oıynshyq qandaı bolatynyn aldyn ala bilmeıdi. Bul tásil jáne shekteýli tıraj kollektsıonerler men jankúıerler arasynda suranysty arttyryp otyr.
2022 jyly Londonda Pop Mart-tyń alǵashqy eýropalyq dúkeni ashylǵaly beri Ulybrıtanııada Labubu-ǵa degen qyzyǵýshylyq kúrt artty. Buǵan áleýmettik jelilerdegi jarnama aıtarlyqtaı áser etti: oıynshyqtar Rıanna, Dýa Lıpa sııaqty tanymal juldyzdar men blogerler arqyly keńinen nasıhattaldy.
Dúkenderdiń aldynda adamdar tańnan nemese tipti túnnen bastap jınalatyn bolǵan. Keıbir jaǵdaılarda bul jaǵdaı baqylaýdan shyǵyp, ıteris-talas pen janjaldarǵa ulasqan.
Mysaly, ótken aptada Daily Mail basylymy osyndaı kezekterdiń birinde satyp alýshylar arasynda jappaı tóbeles bolǵanyn jazdy. Oqıǵa ornynan túsirilgen vıdeolar áleýmettik jelilerde taralyp, birneshe adamnyń bir-birine qol jumsap, kúzetshilerdiń jaǵdaıdy retteýge tyrysqanyn kórsetti.
Osy oqıǵalarǵa baılanysty Pop Mart Instagram paraqshasynda Ulybrıtanııadaǵy barlyq 16 dúkeninde Labubu satylymynyń maýsym aıyna deıin ýaqytsha toqtatylǵanyn habarlady. Kompanııa muny qaýipsizdik máseleleriniń aldyn alý sharasy dep túsindirdi.
— Bul jaǵdaı Labubu men Monstrlarǵa degen súıispenshilik pen qyzyǵýshylyqtyń deńgeıin kórsetkenimen, biz úshin bastysy — barlyq klıentter men qyzmetkerler úshin qaýipsiz, ádil ári jaıly saýda jasaý múmkindigin qamtamasyz etý, — delingen resmı málimdemede.
Sonymen qatar Pop Mart onlaın satylymnyń jalǵasa beretinin, al bolashaqta satyp alý úderisin ádil ári uıymdasqan júıesin ázirlep jatqanyn málimdedi. Kompanııa oıynshyqtyń kelesi partııasy týraly aqparatty ózderiniń resmı arnalarynan qadaǵalaýdy surady.
Aıta keteıik, TikTok jelisinde #Labubu heshtegi 1,4 mıllıonnan astam, al Instagram-da 925 myńnan astam jazba jınaǵan.
Buǵan deıin habarlanǵandaı, Lego óńdelgen plastıkten oıynshyq jasaý josparynan bas tartty.