Qyzylordalyq polıtseıler ınternet-alaıaqtar tobyn qolǵa túsirdi
Qyzylorda oblysy Polıtsııa departamentiniń qyzmetkerleri bıylǵy jyldyń sáýir aıynan bastap talaıdy san soqtyrǵan ınternet alaıaqtardy ustaý baǵytynda arnaıy is-shara júrgizdi.
«Ótken jyldyń qarasha aıynan bastap óńirde turǵyndarǵa belgisiz bireýler telefon arqyly habarlasqan. Onda jaqyny esirtki zatymen ustalyp turǵanyn aıtyp, ony jazadan bosatý úshin arnaıy esepshotqa dereý qarajat aýdarý qajettigin eskertken. Oblysta osyǵan uqsas 32 qylmystyq is tirkelgen. Jábirlenýshilerge keltirilgen shyǵyn - 24 mıllıon teńge», - dep málim etti Qyzylorda oblystyq polıtsııa departamentinen.
Vedomstvo málimetinshe, osy maqsatta oblystyq Polıtsııa departamenti bilikti qyzmetkerlerinen jasaqtalǵan jedel-tergeý toby qurylyp, tergeý amaldary bastaldy. Tergeý nátıjesi jınaqtalǵan aıǵaqtar boıynsha mamandar alaıaqtyq tásilderdiń dálme-dál uqsastyǵyna nazar aýdardy. Qylmystardyń barlyǵy belgili bir qylmystyq top arqyly jasalǵandyǵyn anyqtady.
Jedel tergeý toby alaıaqtardyń is-áreketin dáleldeıtin aıǵaqtardyń jetkilikti deńgeıde jınalǵandyǵyn nazarǵa aldy. Nátıjesinde Almaty, Aqtóbe jáne Jambyl oblystarynda arnaıy is-shara ótkizdi. Іs-shara barysynda ár oblysta bir-birimen sybaılasý arqyly alaıaqtyqpen aınalysqan 8 adamnan quralǵan qylmystyq top quryqtaldy.
Alaıaqtardyń meken-jaıyn tintý barysynda qylmys quraly retinde qoldanylǵan 17 uıaly telefon, beıtanys tulǵalardyń atyna jasyryn tirkelgen 15 abonenttik nómir, 60 azamattyń JSN, aty-jóni jazylǵan tizim, aqsha aınalymyn tirkegen bloknot anyqtalyp, aıǵaq zat retinde tárkilendi», - dedi departamentten.
Eske salsaq, budan buryn Qyzylordada túrmege esirtki men telefon laqtyrmaq bolǵan eki adam ustaldy.
