Qyzylordalyq ǵalymdar «Aqtós» atty robot ıt qurastyrdy
Syr óńirinde bıyl robottyq tehnıka men IT mamandaryn daıarlaýǵa erekshe mańyz berilip otyr. Olardyń alǵashqy legi Tatarstannyń Innopolıs ınstıtýtynda oblys ákimdiginiń granty negizinde bilim almaq.
Qorqyt ata atyndaǵy Qyzylorda memlekettik ýnıversıtetiniń jas ǵalymdary jasaǵan bul robot aıaǵyn teń basqan robot retinde elimizde alǵash ret qurastyrylyp otyr. Kóbine mundaı qultemirler dóńgelek arqyly syrǵıdy. Jas ǵalymdar bul dúnıesin «Aqtós» dep atapty. Ázirge robot ıtke tán qımyldardy jasaı alady. Endi arnaıy onyń ıisti, jaryqty, dybysty, temperatýra men adamdardyń túr-kelbetin ajyratý sekildi múmkindikterin arttyrý kózdelip otyr.
«Bul jerde biz stýdentke robottyń ne ekenin, qaıdan shyqqanyn, qalaı jasalatynyn barlyǵyn útir-núktesine deıin kórsettik. Bul jerde 3D prınterdi kelistire otyryp, birge jumys jasap, Aqtós robotyn jasap shyǵardyq», -deıdi ýnıversıtettiń esepteý tehnıkasy jáne aqparattyq júıeler kafedrasynyń meńgerýshisi Sábıt Ibadýlla.
Munan soń ǵalym ózge ýnıversıtet izdenýshileri «smart murajaı» baǵytynda da izdenis ústinde ekenin, ol úshin oqý ornynda barlyq jaǵdaı jasalyp otyrǵanyn aıtty.
Sondaı-aq, oqý orny janynan kompıýterlik jelilerdi jobalaý, qurý, qorǵaý baǵytynda bilim beretin búkilálemdik akademııanyń ókildigi de ashylǵan. Bolashaq IT mamandardy sheteldiń oqý oryndarynda oqytýǵa da basymdyq berilip otyr. Taǵy bir jaǵymdy jańalyq aǵymdaǵy jyldyń qańtar aıynda Tatarstan Respýblıkasynyń Innopolıs ınstıtýtynda 20 mamandy daıyndaýǵa kelisim jasalyp otyr eken.
Jalpy búginde óńirge qajetti mamandyqtar boıynsha 452 qyzylordalyq túlek Reseı Federatsııasynyń granty negizinde bilim alýda. Olar aldaǵy ýaqytta Syr óńirinde iske qosylatyn shyny zaýyty men Shalqııa kenishi sekildi óndiris oryndarynda qyzmet isteıdi.
Aıta keteıik, ótken jyly mektep bitirgen óńir túlekteriniń 97 paıyzy oqý oryndaryna túsken. Al ulttyq biryńǵaı testileý nátıjesi boıynsha Qyzylorda oblysy el óńirleri arasynda 5-orynǵa kóterildi.
