Qyzylordalyq dıqandar «Syr sulýy» sortyna alǵash ret oraq saldy
Tuńǵysh Prezıdent - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna joldaýynda agroónerkásip kesheniniń áleýetin tolyq iske asyrý qajettigi atap kórsetilgen.
Atalmysh sortty Qyzylorda qalasyndaǵy Y. Jaqaev atyndaǵy Qazaq kúrish ǵylymı-zertteý ınstıtýtynyń ǵalymdary shyǵarǵan. Jańa sort bıyl tuńǵysh ret óndiriske engizildi. «Syr sulýy» Jalaǵash aýdanyndaǵy «Tań LTD» sharýashylyǵyndaǵy 8 gektar alqapqa egildi.
Instıtýt ǵalymdary bul sorttyń tuzdylyqqa jáne tómengi temperatýraǵa tózimdiligin aıtady. Konkýrstyq sort synaǵy barysynda onyń ónimdiligi gektaryna 70-80 tsentnerdi shamalady. Nátıjesinde standartty deńgeıden 4-7 gektarǵa deıin artyq ónim berdi. Eń joǵary ónim túptený fazasynyń basynda jáne aıaǵynda azot tyńaıtqyshymen ústep qorektendirgende alyndy. Ǵalymdar «Syr sulýy» sortyn elimizdiń kúrish ósiretin barlyq aımaǵynda óndiriske engizýge bolatynyn aıtady. Bul sort aýa raıynyń qolaısyz jaǵdaıy men topyraq ereksheligine de tózimdi. Sondyqtan ony óńirdiń barlyq kúrish sharýashylyǵynda ósirýge bolady. Sol arqyly turaqty ónim alýǵa barlyq múmkindik bar. Ónim sapasy da kóńilden shyǵady.
«Bıyl kúrishtiń «Syr sulýy», «Áıgerim» sorttaryn egýdi bastap kettik. Bul sorttardyń ózge kúrish jáne reseılik sorttarynan kóptegen artyqshylyǵy bar. Aldaǵy jyly Syr óńirinde egiletin kúrish alqabynyń 20-25 paıyzyn otandyq jańa sorttarmen qamtamasyz etemiz. 2021 jylǵa deıin olardyń aýqymyn 50-55 paıyzǵa deıin arttyrý mejelenip otyr», - dedi Y. Jaqaev atyndaǵy Qazaq kúrish ǵylymı-zertteý ınstıtýty bas dırektorynyń mindetin atqarýshy Áset Toqtamysov.
Syr óńirinde sońǵy ret jergilikti kúrish sorty 1983 jyly óndiriske engizilgen. Sol kezeńde qyzylordalyq dıqandar «Marjan» sortynan egip, odan mol ónimge negiz qalaǵan edi.
