Qyzylordalyq 4 pedagog «Úzdik ustaz» atanyp, 3 mln teńgeniń sertıfıkatyn aldy
Bul týraly QazAqparat Qyzylorda oblysy ákiminiń baspasóz qyzmetine silteme jasap habarlaıdy.
Baıqaýdaǵy bıylǵy erekshelik - ár óńirden barǵan ustazdar elorda mektepteriniń birinde ashyq sabaq ótkizip, ádisimen bólisedi.
30 jylǵa jýyq bilim salasynda tájirıbesi qalyptasqan Qyzylorda qalasyndaǵy №23 mektep-lıtseıiniń bıologııa pániniń muǵalimi Raıkúl Qııasova úzdikter qatarynan kórindi. Ol buǵan deıin Polsha respýblıkasynyń Varshava qalasynda ótken eýropa elderi arasyndaǵy ІІІ olımpıadanyń jeńimpazy atanyp, aımaqqa oljaly oraldy.
Sondaı-aq, «Úzdik avtorlyq baǵdarlama» respýblıkalyq konkýrsynyń ІІ dárejeli jeńimpazy. «Qyzylorda oblysynyń bilim berý salasyn damytýdaǵy eńbegi úshin» tósbelgisimen marapattalǵan.
«Úzdik pedagog» baıqaýynyń taǵy bir jeńimpazy aýyl mektebiniń muǵalimi - Saltanat Qosjanova. Ol Jalaǵash aýdanyndaǵy №123 mektepte qazaq tili men ádebıeti páni boıynsha sabaq beredi. Pedagogıkadaǵy úzdik tájirıbesi eskerilip, «Qyzylorda oblysynyń bilim berý salasyn damytýdaǵy eńbegi úshin» tósbelgisin alǵan.
«Pedagogıkalyq ıdeıalar festıvali» respýblıkalyq konkýrsynyń ІІІ dárejeli jeńimpazy atanǵan.
Elordadan jeńispen kelgenderdiń endigi biri pedagogıkada 20 jyldan beri shákirt tárbıeleýde. №9 daryndy balalarǵa arnalǵan oblystyq «Bilim-ınnovatsııa» lıtseı-ınternatynyń geografııa pániniń muǵalimi Lázzat Qulymbetovanyń aımaqqa esimi belgili.
Ulaǵatty ustazdyń shákirti Erasyl Saparbekov Ystanbul qalasynda ótken 17 Halyqaralyq olımpıadadan ІІІ oryn ıelengen jáne Halyqaralyq zııatkerlik olımpıadada jeńimpaz atanǵany úshin QR Prezıdent marapatyn ıelengen.
Óńir atynan respýblıkalyq dodada top jarǵan Mánshúk Mámetova atyndaǵy Qyzylorda pedagogıkalyq joǵary kolledjiniń pedagogıka pániniń oqytýshysy Uljan Esmahanova «Úzdik ustaz» atandy. Onyń pedagogıkalyq tájirıbesi respýblıkalyq dengeıde birneshe márte taratylǵan. «Worldskills Kyzylorda – 2020» oblystyq chempıonatynyń júldegerlerin daıyndaǵan. «2021 jyldyń qorytyndysy boıynsha «Jyl úzdigi» nomınatsııasyna ıe bolǵan.
Aıta keteıik, aımaqta oblys ákimi Nurlybek Nálibaevtyń qoldaýymen jyl qorytyndysymen eńbegimen kózge túsip, bilimimen top jarǵan 10 ustazǵa jeltoqsan aıynda bir rettik 900 myń teńgeniń aqshalaı sertıfıkaty tabystalady.
