Qyzylordadaǵy ІT-park jastarǵa jańa múmkindikter ashady
Elbasy Joldaýynda jańa tehnologııalardy meńgerýge basa nazar aýdarý máselesi tıisti sala mamandaryna júktelgen. Osyǵan oraı, Syr óńirinde jańa zaman talabyna saı jobalardy júzege asyrýǵa erekshe nazar aýdarylyp keledi. ІT-park sondaı ıgi istiń biri bolyp tabylady. Qazirgi tańda oblysta jańa tehnologııalardyń syryn túsine biletin jańa býyn ókilderiniń qatary arta tústi.
Qyzylorda oblysynyń basshylyǵy Tatarstan Respýblıkasynyń astanasy - Qazan qalasyndaǵy ІT-park qyzmetin zerdelep qaıtqan edi. Mundaı jańashyl jobalardy Qyzylorda oblysynda da qolǵa alý múmkindigi zertteldi. Búgingi tańda búkil álem jurtshylyǵy kóz tigetin jańa tehnologııa salasyn meńgergen talantty jastar Syr óńirinde de az emes. Talaby taýdaı talanttardy toǵystyratyn arnaıy ortalyq ashý arqyly olardyń jobalaryn júzege asyrýǵa zor múmkindik týatyny belgili.
«Atalmysh ıgilikti isti elimizdegi tsıfrlandyrý baǵdarlamasy aıasynda qolǵa alyp otyrmyz. Negizgi maqsatymyz - talantty jastardy qoldaý. Qazirgi kúnderi ІT-park arqyly jastarǵa ınnovatsııalyq jobalardy júzege asyrýǵa barlyq múmkindik bar. Munda laborotorııalyq sımýlıator, 2D, 3D grafıkalyq jobalardy ázirleýge nazar aýdarylyp otyr. Nátıjesinde jobalardy ázirleý men óndiristegi qoldanysyn testileýge, aqparattyq-baǵdarlamalyq ónimder jasap shyǵarýǵa, óndiris jáne oblys damýynyń salalaryn avtomattandyrýǵa jáne olarǵa qyzmet kórsetýge qolaıly jaǵdaı jasalady», - dedi oblystyq tsıfrlyq tehnologııalar basqarmasynyń basshysy Indıra Aqjigitova.
Sońǵy jyldarda Qyzylorda oblysynda «HackDay» ıdeıalar festıvali júıeli túrde ótkizilip keledi. Qyzylorda oblysy ákimdiginiń qoldaýymen ótkiziletin atalmysh is-shara óz tıimdiligin dáleldep úlgerdi. Festıval Syr óńirindegi jobalyq basqarý aıasynda qolǵa alynǵan. Festıval barysynda oǵan qatysýshylar jańa ıdeıalarymen bólisti. Eń qyzyqty jobany quryp, jańa tájirıbege jol ashatyn shara barysynda jastardyń kóptegen jańashyl isteri el nazaryna usynyldy. Aýqymdy shara barysynda 500-ge tarta jas qatysyp, olar aqparattyq tehnologııa, kıno jáne vıdeo, kontent jáne medıa-sektsııa boıynsha biliktiligin arttyrdy. Festıvalde usynylǵan kóptegen jobalar mamandar tarapynan joǵary baǵalandy.
«Bıyl Jastar jylynyń aıasynda jas býyn ókilderine kóptegen qoldaý jasalatyn bolady. Olardyń ǵylymǵa degen qyzyǵýshylyǵyn arttyrýǵa, óz qabiletin kórsetýge múmkindik jasalyp otyr. 2017 jyly «HackDay» ıdeıalar festıvalin ótkizý aldynda oǵan 100-ge tarta jas jetkinshekter qatysady dep josparlaǵan edik. Nátıjesinde 500-ge jýyq jas óz jobasyn usyndy. Bıyl osy sharalardyń biri retinde baǵdarlamalaý mektebin ashýdy josparlap otyrmyz. Atalmysh mekteptiń negizgi maqsaty - jastarymyzdyń bilim deńgeıin reseılik oqý baǵdarlamasy negizinde kóterý bolyp tabylady. Ol mekteptiń ashylýyn 9 naýryzǵa josparlap otyrmyz», - dedi Indıra Aqjigitova.
Syr óńirinde ІT jobalar boıynsha kóptegen is-sharalar qolǵa alynyp otyr. Búgingi kúnge deıin bul maqsatta 36 is-shara ótkizildi. Onyń ishinde 3 meetup, 1 sheberlik dárisi ótkizildi. Sondaı-aq, 19 qysqa merzimdi baıqaý, 1 aqparattyq qaýipsizdik týraly kýrs ótkizildi. Oǵan qosa robotehnıka, 3D modeldeý negizinde kýrstar jasaldy.
Syr óńirinde jastardyń jańa tehnologııalardy meńgerýine barynsha qolaıly jaǵdaı jasalyp keeldi. Oblys ákiminiń bilim berý granty boıynsha kóptegen jastar elimizdiń bedeldi joǵary oqý oryndarynda bilim alyp otyr. Bilim grantynyń 70 paıyzǵa jýyǵy osy mamandyqtarǵa qarastyrylǵan.
