Qyzylordada jyl basynan beri 67 alaıaqtyq qylmysy tirkeldi

QYZYLORDA. QazAqparat - Qyzylorda oblysynda jyl basynan beri 67 alaıaqtyq qylmysy tirkeldi, dep habarlaıdy QazAqparat tilshisi.

Oblys polıtsııasy ınternet alaıaqtyqqa tosqaýyl jasaý maqsatynda tıisti is-sharalardy qolǵa alyp keledi. Bul baǵytta onyń jasalý tásili jáne oryn alýyna yqpal etetin mán-jaılarǵa únemi taldaý júrgiziledi.

Qazir ǵalamtor arqyly jasalǵan alaıaqtyq alańdatyp otyr. Mundaı qylmystyń jasalý ádisi men alaıaqtyq shemasy damyp keledi.

«Jyl basynan beri oblysta 67 alaıaqtyq qylmysy tirkeldi. Onyń 36-y (53,7 paıyzy) ınternet-alaıaqtyq qylmysyna jatady.

Ǵalamtor arqyly jasalǵan alaıaqtyqtyń basym kópshiligi onlaın nesıeler rásimdeý, ınternet qosymshalary arqyly mobıldi qurylǵyny paıdalaný kezinde bolady. Alaıaqtar kóp jaǵdaıda Sizge jalǵan sóıleý arqyly, uıaly telefonyńyzdy qashyqtan basqarýǵa múmkindik beretin baǵdarlama ornatýǵa úgitteıdi, sondyqtan bóten adamnyń suraýymen ózińizge beımálim qosyshalardy júkteý kezinde óte saq bolyńyz», - dep eskertedi Qyzylorda oblystyq polıtsııa departamentinen.

Eske salsaq, buǵan deıin Qyzylordada halyqaralyq izdeýde júrgen adamnyń ustalǵanyn habarlaǵan bolatynbyz.