Qyzylordada jazýshy-jýrnalıst Qazı Danabaevty eske alý keshi ótedi
Bıyl qalamgerdiń esimi oblys ortalyǵyndaǵy kóshelerdiń birine berilip, eskertkish taqta ornatylatyn bolady, dep habarlady QazAqparat tilshisi.
Jazýshyny eske alý sharasy osy jyldyń 25-26 mamyryna belgilengen. 25 mamyrda Qyzylorda qalasynda (saǵat 17.00-de) Qorqyt Ata atyndaǵy memlekettik ýnıversıtetine qarasty «Stýdentter saraıy» ǵımaratynda shyǵarmashylyq kesh ótedi. Oǵan «Qazaq ádebıeti» gazetiniń bas redaktory Jumabaı Shashtaıuly, ádebıet synshysy Qulbek Erkóbek, jyraý Almas Almatov, ánshi Elena Ábdihalyqova, Elmura Jańabergenova, jazýshy Qýanysh Jıenbaev sekildi ádebıettegi áriptesteri qatysatyny josparlanýda.
26 mamyr kúni (saǵat 16.00-de) «Bolashaq» ýnıversıtetiniń bas ǵımaratynda da shyǵarmashylyq kesh ótkizilip, jýrnalıstiń qaıratkerlik qyry, qazaq ádebıetine qosqan jazýshylyq úlesi, azamattyq bolmysy aıshyqtala túspek.
Qazı Danabaevtyń «Shońtóbe. Shotaı. Baldaýren» povesi 1988 jyly respýblıkalyq «Jalyn» jýrnaly jarııalaǵan jabyq báıgesinde júlde alǵan. «Saǵynysh eken bala kez», «Nartulǵa», «Dostarym meniń dostarym» sekildi t.b kitaptary ár kezeńderde jaryq kórdi. Qazı Sońǵybaıulynyń shyǵarmashylyǵynan «Ulan» gazetine, «Aq jelken» jýrnalyna úzik-úzik jarııalanǵan áńgimeler jınaǵy qazaq balalar ádebıetiniń salmaǵyn qomaqtaı tústi. Aqyn Farıza Ońǵarsynovamen, Hasen Oraltaımen bolǵan shyǵarmashylyq baılanysy jazýshynyń prozadaǵy tinin kúsheıtti.
Qazı Danabaev pýblıtsıstıka janrynda ekonomıkalyq taqyrypta jergilikti munaıshylardyń jaǵdaıyn, áleýmettik salada muǵalimderdiń muqtajyn, dárigerler dabylyn, ekologııanyń dert pen daýasyn dindep jazdy. Sol maqalalary respýblıkalyq «Jas Alash», «Egemen Qazaqstan», «Altyn Orda», «Zaman-Qazaqstan» gazetteri arqyly jaryq kórdi. Qoǵamǵa qozǵaý salyp, máselen, Qyzylorda oblysy turǵyndaryna ekologııalyq ústeme qarjynyń saqtalyp qalýyna tikeleı sebepshi boldy.
