Qyzylordada jastar forýmy ótti
Dástúrli forýmǵa mektep oqýshylary men stýdentter, jas mamandar, sondaı-aq belsendi sanattaǵy ózge de jastar qatysty. Aımaqtaǵy halyqtyń 24 protsenti - 14-29 jas aralyǵyndaǵy jastar. Olardyń sany 190 myńnan asyp jyǵylady. Sonyń ishinde ekonomıkalyq turǵydan belsendileri - 110 myńnan astam. Aıta keteıik, Qyzylorda oblysynda jalpy 700 myńnan astam adam turady.
Óńir basshysy Qyrymbek Kósherbaev forým qatysýshylaryn 2019 jyldyń resmı túrde «Jastar jyly» dep jarııalanýymen quttyqtady.
«Elbasymyz osy jylǵy Joldaýynda jastardy qoldaýǵa arnalǵan sharalardy qamtıtyn áleýmettik satynyń aýqymdy platformasyn qalyptastyrýdy tapsyra otyryp, 2019 jyldy «Jastar jyly» dep aıqyndaýynda da erekshe mán bar. Óıtkeni, Elbasy Máńgilik eldiń jastaryn, sizderdi el muraty úshin qyzmet etetin tulǵa retinde kórgisi keledi. Bul artylǵan senim barshamyzǵa zor mindet júkteıdi. Al senim údesinen shyǵýǵa sizderdiń áleýetterińiz de, sizderge kórsetiletin qoldaý da jetkilikti»,-dedi oblys ákimi.
Qyzylorda oblysynda memlekettik jastar saıasatyn júzege asyrý boıynsha, jastarǵa bilim berý jáne jumysqa ornalastyrý, sondaı-aq olardyń básekege qabilettiligin arttyrý baǵytynda júıeli jumystar atqarylýda.
Óńirde memlekettik jastar saıasatyn damytý boıynsha 2021 jylǵa deıingi Jol kartasy ázirlendi. Qujatta jastardyń ózekti máseleleri - jumysqa ornalasý, turǵyn úı, bilim berý, bos ýaqytty tıimdi paıdalaný jáne basqa da máselelerdi sheshý boıynsha sharalar qarastyrylǵan. Sonymen qatar, 60-tan astam áleýmettik joba júzege asyrylýda.
Aıta keteıik, Qyzylorda oblysy memlekettik jastar saıasatyn qarjylandyrý boıynsha kóshbasshylardyń qatarynda.
Sonymen qatar, respýblıkada alǵashqylardyń biri bolyp aımaqta eńbek resýrstarynyń balansy (qory) ázirlenip, eńbek naryǵyndaǵy suranystar men qajettilikterge oraı jyl saıyn jańartylyp otyr. Sondaı-aq, Syrdarııanyń sol jaǵalaýynan memlekettik-jekeshilik áriptestik aıasynda jastarǵa qyzmet kórsetý ortalyǵynyń qurylysy júrgizilip jatyr. Nysan kelesi jyly paıdalanýǵa beriledi.
Oblysta - sandyq tehnologııalar men ınnovatsııalyq óndiristerge túlekterdi oqytý basym mánge ıe. 2014 jyldan bastap Syrdyń talapty da talantty mektep túlekteri úzdik otandyq jáne reseılik joǵary oqý oryndary men kolledjderde bilim alýda. Ústimizdegi jyly alǵashqy 74 jas maman Reseıdiń aldyńǵy qatarly ınjenerlik oqý oryndarynyń dıplomdaryn alyp, elge oraldy. 29 maman aımaqtyń túrli ónerkásipterinde qyzmetterin bastady jáne 45-i magıstratýrada oqýlaryn jalǵastyrýda.
Bıylǵy jyldan bastap aýyldyq jerlerdegi az qamtylǵan jáne kópbalaly otbasylardan shyqqan daryndy balalarǵa arnalǵan oblys ákiminiń bilim granttarynyń sany 2 esege artty. Olardyń sany 200-ge deıin jetkizildi, 70 protsenti IT-mamandyǵyna bólingen. Kelesi jyly granttar 75 protsentke deıin artady. Osylaısha, búgingi tańda grant ıegerleri 900-ge jýyqtady.
«Osymen eki jyl qatarynan qyzylordalyq mektep bitirýshilerdiń 97 protsenti joǵary jáne orta arnaýly oqý oryndaryna túsip otyr. Bıyldyń ózinde olardyń 70 protsenti joǵary oqý oryndaryna, 27 protsenti orta arnaýly oqý oryndaryna oqýǵa tússe, 57 protsenti memlekettik bilim granty ıegerleri. Mine, osy kórsetkishtermen biz maqtana alamyz!» - dedi aımaq basshysy.
Forýmda aımaqtyń belsendileri sóz sóıledi. Olar ózderiniń jetistikke jetý joldarymen bólisti.
Sondaı-aq oblys ákimi birqatar jasty alǵys hattarmen marapattady.
Budan buryn habarlaǵanymyzdaı, Qyzylordada jastar eńbek jasaqtary belsendi qyzmet atqaryp keledi
