Qyzylordada jappaı tártipsizdik kezinde ańshylyq dúkennen 6 mln teńgeniń zaty urlanǵan

QYZYLORDA. QazAqparat - Qyzylorda oblysynda jappaı tártipsiz kezinde ańshylyq dúkeninen 6 mln 212 myń teńgeniń zattary urlanǵan, dep habarlaıdy QazAqparat tilshisi.

Óńirde birneshe organnan qurylǵan vedomstvoaralyq jedel-tergeý toby tarapynan qylmystyq istiń mán-jaıyn jan-jaqty, tolyq jáne obektıvti túrde tergep-tekserý áreketteri júrgizilýde.

Ustalǵan azamattardan tergep-tekserý barysynda zattaı dáleldemeler alyndy. Olar - 3 qarý-jaraq, onyń bireýi AKSÝ avtomaty men 20 arnaıy şıt, dýbınka, kaska quraldary.

Sondaı-aq, qaladaǵy lombardtyń birinen jalpy quny 300 mln teńge turatyn altyn buıymdar urlanǵan. Al ańshylyq dúkennen 6 mln 212 myń teńgeniń zattary qoldy bolǵan. Atalǵan qylmystar boıynsha kúdikti retinde Qyzylorda qalasynyń 5 turǵyny qamaýǵa alyndy.

«Búgingi kúnge azamattardan polıtsııa organdary qyzmetkerleriniń áreketine qatysty Ózindik qaýipsizdik basqarmasyna 25 aryz-shaǵym kelip túsken. Bul boıynsha tekserý jumystary júrgizilýde», - dedi Qyzylorda oblysy Polıtsııa departamenti bastyǵynyń orynbasary Baıjan Baıgeldi.