Qyzylordada respýblıkalyq jas aqyndar aıtysy ótti

QYZYLORDA. QazAqparat - Qyzylorda qalasynda ótken «Ulttyń aıbyny - rýh baılyǵy» atty respýblıkalyq aqyndar aıtysynda elimizdiń ár óńirinen jınalǵan jas aqyndar aıtys kórigin qyzdyrdy, dep habarlaıdy QazAqparat tilshisi. 

Respýblıkalyq jastar aıtysyn oblystyq jastar saıasaty máseleleri basqarmasy men «Syr eli jáne HHІ ǵasyr» qoǵamdyq qory uıymdastyrdy. Atalmysh sharany oblystyq jastar saıasaty máseleleri basqarmasynyń basshysy Qýanysh Januzaqov ashty. 

«Aıtys - atadan amanat bolǵan qasıetti óner. Búgingi sóz básekesinde jastar taqyrypqa baılanysty oramdy oı, utymdy usynys, oryndy pikirimen kópshilikti rızashylyqqa bóleıdi degen senimdemin. Sharanyń maqsaty - jastardyń básekege qabiletin arttyrý, ulttyq biregeılikti saqtaı otyryp, jastardy ulttyq ónerge baýlý. Sananyń ashyqtyǵyn qalyptastyrýdy maqsat etken bul aıtys óskeleń urpaqty otansúıgishtikke tárbıelep, olardyń tanym-talǵamyn ult rýhanııatyna baǵyttaıdy. Qazaqtyń tól óneri, qudiretti sózi arqyly memlekettik tildiń mereıin arttyrady. Sóz dodasynda baq synaıtyn jastarǵa sáttilik tileımin», - dedi Q.Januzaqov. 

Jastar aıtysyn belgili aıtysker-aqyn, respýblıkalyq «Altyn dombyra» ıegeri Muhtar Nııazov júrgizdi. Oǵan Almaty, Aqtóbe, Qaraǵandy qalalary men Túrkistan, Qyzylorda oblystarynan jas aqyndar qatysty. 

Respýblıkalyq «Ana tili» ult gazetiniń bas redaktory, aqyn Janarbek Áshimjan basshylyq etken ádil qazylar alqasynyń sheshimimen birinshi orynǵa qyzylordalyq Syrym Ádilbek laıyq dep tanyldy. Aqtóbelik Nartaı Tileýqul men qaraǵandylyq Nurmuhammed Baısúgirov ekinshi oryn bıiginen kórindi. Almatylyq Jibek Shahmardan úzdik úshtikti túıindedi.