Qyzylordada medıtsınalyq maska óndirisi jolǵa qoıylady
Atalǵan joba negizinde táýligine 40 myńǵa jýyq betperde tigiledi. Ónim barlyq standart pen sertıfıkatsııa talaptaryna tolyqtaı saı keledi.
Kompanııa dırektory Dilmuhamed Abyzovtyń aıtýynsha, qazir tehnıkalyq iske qosý jumystary júrgizilýde. Kompanııa mamandary elimizde tótenshe jaǵdaı jarııalanǵan tusta alǵash ret medıtsınalyq betperde tigýdi qolǵa alǵan edi.
Degenmen ol soǵan saı jabdyqtalǵan tehnıkalarda jasalǵan joq. Sondyqtan kem-ketik tusy kezdesti. Endigi kezekte Qytaıdan alynǵan tigin mashınasy arqyly betperde barlyq talapqa saı tigiledi.
«Onda barlyq júıesi avtomatty túrde júrgiziledi. Medıtsınalyq betperdeler dárihanalar men baqa da mekemelerge jetkiziledi. Tapsyrys berýshiler az emes. Ónimdi sapaly shyǵarýǵa mán berip otyrmyz. Baǵasy da halyqqa qoljetimdi», - deıdi Dilmuhamed Abyzov.
Seriktestik tórt jyldan beri jumys júrgizip keledi. Alǵashqy ýaqytta túgeldeı maqtadan jasalǵan erler jeıdesin tigýge mashyqtanǵan bolatyn. Ártaraptandyrý barysynda mamandar munaı kompanııalary, QR Qorǵanys, QR Іshki ister mınıstrlikteriniń qurylymdary qyzmetkerlerine arnalǵan arnaıy kıimder tigýge de mán berdi.
«Dalatex» JShS kóptegen sapaly kıimder tigý talaby boıynsha uıymdastyrylǵan halyqaralyq jáne otandyq baıqaýlarda jeńimpaz atanǵan. Kompanııa - oblysta ındýstrıaldy sertıfıkatqa qol jetkizgen alǵashqy óndiris orny.
Dilmuhamed Abyzov aımaqtaǵy jeńil ónerkásip assotsıatsııasyn baqarady. Búginde kompanııa ónimderi Nur-Sultan, Almaty, Shymkent, Semeı jáne Atyraý qalalarynda tutynýshylarǵa satylady.