Qyzylordada kópir men 2 turǵyn úı paıdalanýǵa berildi

QYZYLORDA. QazAqparat - Qyzylordada Jańa jyl qarsańynda Shirkeıli kanaly ústinen salynǵan kópir men oblys ortalyǵynyń sol jaǵalaýynda «Nurly jer» baǵdarlamasy aıasynda salynǵan 2 turǵyn úıdiń páter paıdalanýǵa berildi, dep habarlaıdy QazAqparat tilshisi.

Saltanatty sharaǵa oblys ákimi Gúlshara Ábdiqalyqova qatysyp, kópshilikke jyly lebizin bildirdi.

Jańa 40 páterli eki turǵyn úıdiń qurylysy ótken jyly bastalǵan. Joba quny - 961,4 mln. teńge. Bıyl oblysta barlyq qarjylandyrý kózinen 1 946 páterdi quraıtyn 98 turǵyn úıdiń qurylysy júrgizilýde. Qazirgi tańda Qyzylorda qalasynda 1 741 páterlik 38 kópqabatty turǵyn úıdiń qurylysy jalǵasýda. Keler jyly Syrdarııa ózeniniń sol jaǵalaýynda taǵy 725 páterlik kópqabatty 15 turǵyn úıdiń kilti tabystalady dep josparlanǵan.

Oblys ákimi Gúlshara Ábdiqalyqova Shirkeıli kanalynyń ústinen salynǵan kópirdiń saltanatty ashylý rásimine de qatysty.

«Búgin, jyl toǵysar tusta Syrdarııa ózeniniń sol jaǵalaýyn Shirkeıli arnasy arqyly halyqaralyq avtodálizben qosatyn avtomobıl kópiri paıdalanýǵa berildi. Bul kópir oblys turǵyndarynyń altyn ýaqytyn únemdeýge zor septigin tıgizedi. Búgingi kópirdi paıdalanýǵa berý arqyly aımaqtyń áleýmettik-ekonomıkalyq damýyn oń tendentsııa arttyratyn bolamyz», - dedi oblys ákimi.

«Shirkeıli» arnasy arqyly kópir salýǵa 599 mln teńge jumsalǵan. Kópirdiń uzyndyǵy - 81,8 metr, onda 4 qozǵalys jolaǵy bar. Qozǵalys jolaǵynyń eni - 3,75 metr.

Kópir «Nurly jol» memlekettik baǵdarlamasy aıasynda júzege asyryldy. Qurylys jumystaryn bas merdiger «Servıs NS» jaýapkershiligi shekteýli seriktestigi eki jyl ishinde aıaqtap shyqty.

Sondaı-aq, bıyl Qyzylordada orman ósirý kólemin ulǵaıtý jospary bekitildi.