Qyzylordada Keıden aýylynda 6 adam aýyl ákimi qyzmetine úmitker

QYZYLORDA. QazAqparat - Qyzylorda oblysynda aýyl ákimi saılaýyna eń kóp úmitker Jańaqorǵan aýdany Keıden aýylynda tirkelgen. Aýyldyq okrýgte 6 adam aýyl ákimine úmitker retinde qatysýda, dep habarlaıdy QazAqparat tilshisi.

Okrýgte 500-den astam adamnyń ákim saılaýynda tańdaý bildirýge múmkindigi bar. Qazirge deıin olardyń teń jarymyna jýyǵy saılaý ýchaskesine kelip úlgerdi.

Aýyl ákimi saılaýyna qatysyp jatqan úmitkerlerdiń eń úlkeni - 61 jasta bolsa, eń jasy - 1985 jyly dúnıege kelgen azamat. Olardyń ishinde 2-eýi partııalar atynan dodaǵa tússe, qalǵany ózin-ózi usynǵandar.

«Aýyldyq okrýgke Keıden jáne Aqqum eldi mekenderi qaraıdy. Turǵyndar saılaýǵa belsene qatysýda. Baqylaýshylar saılaý barysyna nazar salyp otyr. Eshqandaı zań buzýshylyq tirkelgen joq. Tıisti sanıtarlyq talaptar saqtalýda», - deıdi №341 saılaý ýchaskesiniń tóraıymy Aıjan Sherýbaeva.

Aýyl turǵyny Álnazar Ábilǵazıev saıası mańyzy zor sharaǵa qatysqanyna qýanyshty ekenin aıtady. Bul bolashaqta aýyl ómirin jaqsartýǵa óz septigin tıgizedi dep sanaıdy.

«Árbir saıası shara turǵyndarǵa úlken jaýapkershilik júkteıdi. Men búgin óz tańdaýymdy bildirdim. Halyq senimine ıe bolǵan azamat aýyldyń gúldenýine kúsh salady degen oıdamyn. Týǵan jerimizdiń túleýine osylaısha barlyǵymyz atsalysatyn bolamyz», - dedi Álnazar Ábilǵazıev.

Oblys boıynsha Jańaqorǵan aýdanynda eń kóp aýyl ákimi saılanady. Munda 13 aýyldyq okrýgte atalǵan saıası mańyzdy shara ótýde.

Aýdandyq saılaý komıssııasynyń tóraǵasy Sultan Ibragımovtyń aıtýynsha, 13 aýyldyq okrýgtegi 17 saılaý ýchaskesinde 45 adam úmitker retinde tirkelgen. Olardyń arasynda úmitker retinde Keıdende - 6 adam tirkelse, ol Kelintóbe, Qyrash, Qosúıeńki, Manapta - 4, Jamanbaı batyr, Talap, Baıkenje, Ekpindi, Ózgent, Qojamberdi, Qojakentte - 3, Kóktóbede - 2 adamdy quraıdy.

Oblys boıynsha 54 saılaý ýchaskesi bar. Onda 304 komıssııa múshesi jumys jasaýda. Óńirde 36 071 adam saılaýshy bar.