Qyzylordada Keńes Odaǵynyń batyry Bilis Nurpeıisovtiń atyna kóshe berildi
Uly Otan soǵysy batyrynyń atyna kóshe berý jáne eskertkish taqtanyń ashylý sharasyna B.Nurpeısovtiń baýyrlary, aǵaıyn-týystary, qala turǵyndary jáne qala ákimi Nurlybek Mashbekuly qatysty.
- Bul shara elimizdiń eń qasıetti de qasterli merekeleri 7 mamyr - Otan qorǵaýshylar kúni jáne 9 mamyr - Jeńis kúni, Qazaqstan Respýblıkasy Qarýly Kúshteriniń qurylǵanyna 25 jyldyq mereıtoıy qarsańynda uıymdastyrylýymen erekshelenip otyr.
Búgin, mine, kıeli Syr óńiriniń dańqty perzentterine qurmet kórsetýdiń taǵy bir sharasyn ótkizýdemiz.
Qalamyzdyń kórikti aýdanyndaǵy kósheleriniń birin Uly Otan soǵysynyń jáne Keńes Odaǵynyń batyry, bar qajyr-qaıratymen eren erlik kórsetken Nurpeısov Bilis atamyzdyń atymen ataǵaly turmyz.
Bilis Nurpeısov - boıyndaǵy qaısarlyǵy men batyr bolmysynyń arqasynda 1941-1945 jyldardaǵy soǵysta, ómir men ólim beldesken alapat aıqasta eren erlik úlgisin kórsete bilgen batyr tulǵa.
Qasıetti mereke kúni biz azamattyq ardy tý etip, óz ómirlerin qurban etken batyr babalarymyzdyń aldynda bas ıemiz.
Saltanatty túrde ashylǵaly turǵan jańa kóshe, yntymaqty halqymyzdyń mereıin asqaqtatar kórikti oryndardyń birine aınalsyn, - degen qala ákimi N.Nálibaev, barlyq qatysýshylardy merekelerimen quttyqtady.
Sondaı-aq, shara barysynda B.Nurpeısovtiń inisi Júsipbaı Nurpeıisov, Alekseı Myltyqbaevtar batyr atamyzdyń ómir joly men erlik joly týraly sóz etti.
Bilis Nurpeısov - 1919 jyly Qyzylorda oblysy, Qazaly aýdany, Bilis ózeni boıynda dúnıege kelgen.
Qazaq AKSR-iniń quramynda bolǵan Qaraqalpaq avtonomııalyq okrýginiń Petro-Aleksandrovskıı (qazirgi Tórtkúl qalasy) qalasyndaǵy Lýnacharskıı atyndaǵy orta mektepte, Túrikmenstannyń Túrkmenabat (burynǵy Shardjoý) qalasyndaǵy Orta Azııa keme sharýashylyǵynyń FZO mektebinde oqyp, keıin sol jerdegi ózen-sý kóligi tehnıkýmyn bitirgen.
«Albatros» jolaýshy tasymaldaý katerinde kapıtannyń kómekshisi qyzmetin atqaryp, 1935 jyly Tórtkúldegi Qaraqalpaq muǵalimder ınstıtýtynyń fızıka-matematıka fakýltetine okýǵa túsip, ony bitirgen son medıtsınalyq ýchılışede, Taqtakópirdegi orta mektepte qyzmet etken.
1940 jyly Melıtopol Áskerı áýe ýchılışesinde oqydy. Soǵystyń alǵashqy kezeńinen bastap «Pe-2» bombalaýshy ushaǵymen nemisterdiń shabýyldaýshy áskerlerin bombalaýǵa qatysty.
Áskerı tapsyrmalardy oryndaý barysynda jaralanyp, gospıtalda jatty.
Keıin Býrıat - Mońǵol Avtonomııalyq Respýblıkasyndaǵy arnaıy Taıtkýrkn áskerı ushaqtar mektebinde daıyndyqtan ótip, 1 943 jyly maıdanǵa attanady.
Onda tikeleı Joǵary Bas qolbasshylyqtyń Áskerı-áýe kúshterine baǵynatyn, alys qashyqtyqty barlaıtyn 2-Belarýs maıdany 4-áýe armııasyna qarasty 47-jeke gvardııalyq barlaý avıa polkine qabyldandy.
Sol jyldyń kúzinde jas ushqysh Dýnaevskıı jáne atqysh-radıst A.Volkov úsheýi Joǵary qolbasshylyqtyń erekshe kupııa tapsyrmasymen birneshe maıdan shepteri jáne jaý qorǵanystarynan ótip, Berlındi sýretke túsirgen.
1944 jyldyń kókteminde áýe polki Z-Belarýs maıdanynyń kuramynda bolyp, Neman men Vıslaǵa óterdegi tegeýrindi shabýyldarǵa qatysty.
1945 jyly Berlın qalasy aımaǵyndaǵy eki áýejaıdy barlaý tapsyrylyp, áýe zeńbirekteriniń oq jaýdyrǵanyna qaramastan alys qashyqtyqqa ushyp, áskerı strategııalyq nysandardy sýretke túsirip, olardy joıǵany úshin Bilis Nurpeıisovke KSRO Joǵarǵy Keńesi Tóralqasynyń Jarlyǵymen Keńes Odaǵynyń Batyry ataǵy berilgen.
2 márte «Qyzyl Tý», «Qyzyl Juldyz», 1-shi jáne 2-shi dárejeli «Otan soǵysy» ordenderimen, medaldarmen marapattalǵan.
2-shi dúnıejúzilik soǵysqa qatysýshy, ushqysh-shtýrman, gvardııa aǵa leıtenanty Bilis Nurpeıisov 1945 jylǵy 23 sáýirde Germanııanyń Berlın qalasynda erlikpen qaza tapqan.
Qaraqalpaqstan Respýblıkasynda batyrdyń atynda kóshe, mektep bar. Almaty qalasy Qalqaman yqshamaýdanyndaǵy bir kóshege batyrdyń esimi berilgen.
