Qyzylordada qarasha aıynda 319 adam koronavırýs juqtyrdy
Óńirde ótken jyldan beri 19 170 adam qaterli derttiń quryǵyna ilikti. Aýrýǵa shaldyqqandardyń 70 paıyzy klınıkalyq belgisimen anyqtalǵan.
Jalpy tirkelgen derektiń 18 paıyzy byltyr esepke alynsa, qalǵany bıyl esepke alyndy.
«Aıta keterligi, byltyrǵy jyldyń uqsas kezeńimen salystyrǵanda koronavırýs boıynsha salystyrmaly aýrýshańdyq kórsetkishi 3 esege deıin ulǵaıdy. Degenmen sońǵy 2 aıdaǵy kórsetkish tómendedi. Atap aıtqanda, qyrkúıekte 1125 jaǵdaı anyqtalsa, qazanda ol 949 jaǵdaıdy qurady. Ol qarasha aıynyń 15 kúninde 319 adamdy shamalady», - dedi oblystyq sanıtarlyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Ótken táýlikte koronavırýs ınfektsııasyn 7 azamat juqtyrdy. Onyń 6-ýy koronavırýsqa qarsy ekpe saldyrmaǵan. Vırýs juqtyrǵan adamdarmen tyǵyz baılanysta bolǵan 36 adam medıtsınalyq baqylaýǵa alynǵan.
Eske salsaq, budan buryn Qyzylorda oblysynda «Pfizer» vaktsınasyn egý bastaldy.
