Qyzylordada er adam páterde sıntetıka esirtki jasap satqan
Qyzylorda qalalyq Polıtsııa basqarmasy 22 jastaǵy semeılikti sıntetıkalyq esirtki zatyn saqtaǵany úshin ustady.
Olt Qyzylorda qalasynan páter jaldaǵan. Polıtseıler páterge tintý júrgizý barysynda onyń esirtki daıyndap, satý úshin shaǵyn zerthanaǵa aınaldyrǵanyn anyqtady. Páter shinen eki dana gazet qıyndysyna salynǵan sur tústi untaq, elektrondy tarazy, rýlon folga, túrli-tústi ızolenta, skotch jáne arnaıy paketter zattaı dáleldeme retinde alyndy.
«Saraptama qorytyndysy boıynsha tárkilengen untaqtyń jalpy salmaǵy 235,83 gramm «a-pırrolıdınovalerofenen» nemese «a-PVP» psıhotroptyq zattarǵa jatatyny naqtylandy. Kúdikti atalǵan esirtki zattaryn jaldamaly páterde ózi ólshep, daıyndap, ınternet jelisi arqyly tapsyrys boıynsha satatyny anyqtaldy. Kúdikti Qyzylorda qalalyq Polıtsııa basqarmasynyń ýaqytsha ustaý abaqtysyna qamaqqa alyndy. Bul derek boıynsha Qazaqstan Respýblıkasy Qylmystyq kodeksiniń 297-baby 3-bóliginiń 3-tarmaǵyna sáıkes sotqa deıingi tergep-tekserý amaldary jalǵasýda», - dep málim etti Qyzylorda oblystyq polıtsııa departamentinen.
Vedomstvo málimetinshe, qyzylordalyq polıtseıler bir aı kóleminde asa iri mólsherdegi sıntetıkalyq esirtki satýdyń ekinshi deregin anyqtady.
