Qyzylordada alǵash ret kilem toqıtyn sheberler festıvali ótti
Ulttyq qazynany ulyqtaǵan atalmysh sharany Qyzylorda oblystyq kásipkerlik jáne týrızm basqarmasy uıymdastyrdy. Oǵan Qazaqstan qolónershiler odaǵy jáne oblystyq sheberler ortalyǵy qoldaý bildirdi. Kilemder festıvaline Qyzylorda oblysymen qatar, kórshiles Túrkistan oblysy, Shymkent qalasynan qolóner sheberleri keldi.
Jurtshylyq aldynda oblys ákiminiń orynbasary Rýslan Rústemov júrekjardy lebizin bildirdi. Ol qazaq halqynyń tynys-tirshiliginde qolónerdiń máni joǵary bolǵanyn atap ótti. Rasynda, halqymyz erteden eshkimnen kem túspeıtin ulttyq qazynasyn jalpaq jurtqa jarııa ete bildi. Kóne kezeńnen bizge jetken tastaǵy jazýlarda da qanshama oıý-órnek kórinis taýyp, bizdiń tamyrymyz tereńnen tartatynyn taǵy bir márte aıshyqtaı tústi.
«Búgingi kilemder festıvali urpaqtan urpaqqa jalǵasqan altyn ónerdi jarqyrata túsedi. Kózdiń jaýyn alatyn dúnıeler halqymyzdyń dúnıetanymyn aıǵaqtaıdy. Búgingi sharaǵa jınalǵan qolóner sheberlerine tabys tileımin», - dedi R.Rústemov.
Búginde ulttyq ónerdi jas urpaqqa úlgi bolarlyq deńgeıdi nasıhattaý - basty paryzymyz. Qazaq halqynyń ulttyq mádenıeti men salt-dástúrlerin elimizdegi týrızmdi damytý sebepteriniń biri retinde zertteý bul salaǵa erekshe serpin alyp keleri sózsiz.
Shymkent qalasynan kelgen Kúlásh Aıdarbekova Syr óńirinde mundaı sharanyń ótkizilgenine qýanyshty ekenin jetkizdi. Óıtkeni, ótkendi taný arqyly ulttyq bolmys-bitimdi qalyptastyrýǵa bolady. Sol sebepti qolónerdi árdaıym basty nazarda ustap, ony jas urpaqqa úıretýge nazar aýdarǵanymyz artyq emes.
«Men aýyldyq jerde týyp-óstim. Bala kezimizden úlkenderden qolónerdiń qadir-qasıetin kórdik. Shamamen 5-6 synyp oqyp júrgende kilem toqýǵa qyzyǵa bastadym. Úlkenderden kórgenimdi jasaıtyn edim. Osylaısha men sýretshilik joldy tańdadym. Shymkenttegi kórkemóner ýchılışesin támamdadym. Joldasym da sol oqý ornyn bitirdi. Qazir alty balamyz bar. Olardyń barlyǵy qolónerdi kórip ósti. Soǵan beıim. Osy kórmege menimen birge kelgen balam Berik Beıisbekov te teriden túrli buıymdar jasaıdy, qamshy óredi. Aǵash buıymdaryn da jasaıdy. Kórmege kelgen kelinim - Mádına da kilem toqıdy», - dedi K.Aıdarbekova.
Qazaqy kilemder festıvalinde olardyń sanalýan túri qoıyldy. Olardyń arasynda túkti, qaly kilem, alasha jáne basqa da túrleri bar.
Syrdarııa aýdany Aıdarly aýylynan kelgen Roza Álbatyrova qazaqy kilemderdi ózge elden kelgen osyndaı dúnıeler almastyryp jatqanyna qynjylys bildirdi.
«Qazaq kilemderi tabıǵı dúnıeden jasalatynymen erekshelenedi. Oǵan eshqandaı densaýlyqqa zııandy zattar qosylmaıdy. Dese de, búginde kilem toqıtyn sheberler azaıdy. Buryn mundaı dúnıeler aýyldaǵy eki úıdiń birinde toqylyp jatatyn. Qazir ol ilýde bir kezdesedi. Árıne, kilem toqý ońaı emes. Shydamdylyqty, tózimdilikti, iskerlikti qajet etedi. Oǵan birshama ýaqyt jumsaýǵa týra keledi. Búginde kóp adam oǵan erinetin boldy. Bazardan daıyn dúnıelerdi alýǵa beıim. Dese de, ulttyq ónerdi umytpaýymyz kerek. Men sol maqsatta shákirt daıyndap júrmin. Olarǵa ulttyq qazynany zerdeleýdi uǵyndyryp, kórgen-bilgenimdi úıretip kelemin», - deıdi R.Álbatyrova.
Festıval barysynda qazaqy kilemniń baǵasy 370-400 myń teńgege deıin baratynyn bildik. Odan da qymbaty kezdesedi. Óıtkeni, oǵan biraz ýaqyt jumsalady. Qajetti shıkizat baǵasy da arzanǵa túspeıdi.
Shara sońynda qolónerdi damytýǵa úles qosyp júrgen sheberler oblys ákiminiń arnaıy alǵys hatymen marapattaldy. Óz isin jetik biletin sheberler jastarǵa arnaıy dárister ótkizdi.
