Qyzylorda jurtshylyǵy elordanyń Nur-Sultan atalýyna qoldaý bildirdi
Qyzylorda qalalyq A. Toqmaǵambetov atyndaǵy mádenıet úıinde ótkizilgen oblystyq sharaǵa ardagerler, etno-mádenı birlestik ókilderi, úkimettik emes uıym jáne belsendi jastar qatysty.
Patrıottyq shara Elbasynyń el tarıhyndaǵy eńbek jolyna arnalǵan 9 mınýttyq beınerolıkten bastaldy. Shara barysynda aımaqqa belgili qoǵam ókilderi óz pikirlerin bildirdi. Patrıottyq jıyn oblystyq máslıhat hatshysy Naýryzbaı Baıqadamovtyń keń aýqymdy alǵysózimen bastaý aldy.
Odan keıin Qorqyt ata atyndaǵy Qyzylorda memlekettik ýnıversıtetiniń ardagerler keńesiniń tóraǵasy, ekonomıka ǵylymdarynyń kandıdaty Qazybaı Qudaıbergenuly, Qazaqstan halyqtary assambleıasy orys qaýymdastyǵynyń Qyzylorda oblysy boıynsha fılıalynyń tóraǵasy Vladımır Tolokonnıkov, aqyn, oblystyq máslıhat depýtaty Shákızada Ábdikárimov, Qyzylorda oblysynyń «Azamattyq Alıansy» qaýymdastyǵynyń tóraǵasy Jandos Bazartaı óz pikirlerin ortaǵa saldy. Olar elordanyń Nur-Sultan atalýy elimizdiń jańa tarıhı damý kezeńine dańǵyl jol salatynyna toqtalyp ótti.
Respýblıkaǵa belgili aıtysker aqyn, «Altyn dombyra» ıegeri, Syrdyń sańlaq aqyny Muhtar Nııazov óz sózin arnaýmen jetkizip, elordanyń Nur-Sultan qalasy ataýyna aýysýyn tarıhı dáleldermen keltirilgen jyr-shýmaqtarymen órbitti.
